ڤەکۆلەرەک: وەلاتێن عەرەبی ژ هەلوەستێ ئەردۆغانی دلگرانن
فەهیم تاشتەکین ڤەکۆلەرێ ناڤدار یێ تورکیا راگەهاند، پڕانیا وەلاتێن عەرەبی ژ هەلوەستێ نها یێ ئەردۆغانی ل هەمبەر شەرێ د ناڤبەرا حەماس و ئسرائیلێ دا دلگرانن، چونکی حەماس و گەلەک ژ وەلاتێن عەرەبی چاڤەرێ هندێ بوون کو دێ تورکیا ب تەمامی پشتەڤانیێ ل وان کەت و دێ ب توندی ژی بەرسڤا ئسرائیلێ دەت، لێ دەمێ حەماسێ ئێرشی ئسرائیلێ کری، تورکیا داخواز ژ چەندین سەرکردێن حەماسێ کر کو ژ تورکیا دەرکەڤن و ئەو یەک ژی بوویە جهێ دلگرانیا حەماسێ و گەلەک وەلاتێن دی یێن عەرەبی.
ناڤهاتی ئەو یەک ژی دیار کریە، د رەوشا نها دا تورکیا نەڤێت خوە بکەتە پشکەک ژ شەرێ نها، بەلکو تورکیا دڤێت ب رۆلەکێ جودا رابیت دا ببیتە مفادارا ئێکێ یا شەرێ نها د ناڤبەرا حەماسێ و ئسرائیلێ دا، ژ بەر هندێ ژی وەلاتێن عەرەبی ژ هەلوەستێ نها یێ تورکیا دلگرانن.
