ڤەگوهاستنا یاریزانان و فێلبازییا بریكاران
ئیحسان حەسەن
ئەز دبێژم هوون هەموو دگەل ڤێ بوچوونێ نە كو نها چ تشت نینن بناڤێ سۆز و پەیمانان دجیهانا پیشەكاریێ دا، ئەڤرۆكە فوتبۆل یا بوویە بەرژوەندیا یاریزانی و یانەیێ، شیانێن دارایی، تا دگەهیتە زیرەكییا دان و ستاندنێ، یێ باوەری بڤان پیڤەران نەبیت، یان خودان نەبیت، ب رەئیا من باشترە خوە دوور بێخیت ژ جیهانا پیشەكاریێ، ژبەر كو دڤێت ئەم بزانین كو شیانێن مادی و هێزا پارەی، فاكتەرێن هەرە سەرەكی نە بۆ ئینانا باشترین یاریزانان بۆ ناڤ رێزێن تیمێن خوە، ئەو تیمێن گەهشتینە پلێن سەرفەرازیێ زۆربەی وان ئەون یێن كو شیانێن دارایی یێن مەزن هەین، چونكو ئەم یێ ل كوردستانێ و ئیراقێ، ئەم پشكەكین ژڤێ جیهانێ، دڤێت مە باوەری هەبیت كو شیانێن دارایی یێن یانەیان، تیمان لسەر چەند ئاستان بەلاڤدكەن، ئەڤچەندە نەتنێ دجیهانا فوتبۆلێ دا هەیە، بەلكو هەموو بوارێن ژیانێ دا، چونكو ئەڤرۆكە فوتبۆل یا بوویە كار بۆ خودان بەهرەیێن ڤێ یاریێ، هەر یاریزانەك بخوە ل بەرژوەندی و پاشەرۆژا خوە و خێزانا خوە دگەریێت، پێدڤییە یانەیێن مە ژی بخوە ل وان یاریزانان بگەریێن یێن كو شیانێن باش یێن هزری و جەستەیی و تەكنیكی لدەڤ هەبن، ژهەژی وێ هەڤبەستێ بن ئەوا پێ دهێتە دان، هەر چەندە گەلەك جاران تیمێن مە دبنە قوربانی فێلبازیا بریكارێن یاریزانان یێن كو ستێرێن وان ماف لسەر هەین دژی یانەیێن وان بكاردئینن، وان ب نەویی دئێخنە لبن پروسێسا كرین و فرۆتنێ دا، بكار ئینانا ناڤێن هژمارەكا یانەیێن دی یان یێن هەڤرك، بۆ هندێ ئەو پتر قازانجێ ژ وەرزێ بوری ژ فرۆتن یان مانا ڤی یاریزانی بكەن، دبیت یاریزان سێ تا چار جاران پتر ژ ئاستێ خوە داخوازا پارەكێ مەزنتر بكەت، ببیتە بارگرانیەك بۆ یانەیان،هەروەسا نەچاریەك و گڤاشتنەك ب تایبەت ژلایێ پشتەڤان و راگەهاندنێ ڤە كو گرێبەستنا خوە دگەل ڤان یاریزانان نووكەنە ڤە وستێرن خوە پارێزن، لەوما پێدڤییە هەر پیشەكارەكێ هەڤبەست دگەل بهێتە گرێدان، بكەڤیتەلبن هندەك پیڤەرێن گرێدای یانەیێ ڤە، ئەوژی ئەوبیت كا ئەڤ یاریزانە ژلایێ تەكنیكی ڤە دێ شێت چ پێشكێشی یانەیێ كەت، ژبلی هندێ ئەوا ماوەیێ دێ مینتە دگەل تیمێ ئەگەر باروەرد بهیتە كرن دگەل ئەو پارەیێ پێ هاتیە دان ب تایبەت ئەگەر یێ نوو بیت، دێ چەند كارتێكرنێ لسەر یاریزانێن وەرزێ بوری یێن یانەیێ بۆ نووكرنا هەڤبەستێن خوە كەت، ئەگەر ئەم بزانین كو هەر یاریزانەكێ سۆپەر یێن كو گرێبەست دگەل دهێنە گرێَدان حەز دكەن ببنە خودانێن بریار دناڤا تیمێ دا، ل دووماهییێ یا من دڤێت بێژم چ جاران سۆز و پەیمان نابنە پیڤەر بۆ دەستنیشانكرنا دان و ستاندنێن هەر یانەیەكێ دگەل پیشەكارەكی، یاكو وی پیشەكاری دئینتە پێش شیانێن وی یێن تەكنیكی و ماوەیێ گرێبەستا وی نە، ئەو پارەیێ پێ دهێتە دان، زێدەباری هندێ ڤەگوهاستنا وی كارتێكرنێ دپێكهاتییێ تیمێ دا نەكەت.
