کارمەندەکێ ئەڤرۆ بوو یێ ئێکێ
ئەڤرۆ نيوز:
ھەلبەستڤانەکێ کورد، کو خەلکێ پارێزگەھا دھۆکێ یە، پشتی پشکداری د بەریکانەکا نێڤدەولەتی ل سەر ئاستێ وەلاتێن عەرەبی دا کری ، پلا ئێکێ ب دەستخوەڤە ئیانا.
ھەلبەستڤان عەدنان رێکانێ، کو بەرپرسێ لاپەرێ (ھەرێم و عیراق) ل رۆژناما ئەڤرۆ گۆت: دەزگەھێ نێڤدەولەتی یێ ب ناڤێ (المؤسسة العربية الدولية للأدب و الشعر و الثقافة) ل وەلاتێ مسرێ ئەو بەریکانە رێکخست بوو، سالانە ئەو بەریکانە ب رێیا دەربازبوونا چەندین قووناغان و ب چاڤدێریا ماموستایێن خودان شیان و بسپۆر دھێتە ئەنجامدان، بۆ ئەڤ سالە مەرجێن زۆر توند و ب زەحمەت ھاتبوونە دانان، بەلێ سوپاس بۆ خودێ ئەم شیاین پلا ئێکێ ب دەستخوەڤە بینین.
ناڤبری دیارکر، پتر ژ 130 ھەلبەستڤانێن عەرەب ب ھەردو رەگەزان پشکداری دوێ بەریکانا نێڤدەولەتی دا کربوو، بەریکانە ب ھەموو شیۆازێن ھەلبەستان ھاتیە ب رێڤەبرن، ھەلبەستا ئازاد و پەخشان و کێشە و سەروە، زێدەباری نڤیسینا گۆتاران و چیرۆک و کن چیروک و پەندۆکێن ھەلەبستێ ژی.
ل دووماھیێ گۆت: ھەلبەستا من ب ناڤێ (عرشك یا بلقیس) شیایە ل سەر ئاستێ ئێکێ بیت پشتی ھەموو مەرجێن لژنا دادەوری ب سەرکەفتیانە دەربازکرین.
