کارکرنا ژنان د کەرتێ تایبەت دا د ئاستەکێ باش دایە
بێوار حەمدی:
سەرەڕای کارکرنا ژنان د کەرتێ حکومی دا، نها ڕێژەیا کارکرنا ژنان د کەرتێ تایبەتدا د ئاستەکێ باش دایە و گەلەک ئافرەت هەنە پشتبەستنێ لسەر خۆ دکەن و کار و پڕوژەیێن تایبەت بخۆ هەنە جاران د کارێن بازرگانی دا ئافرەت سەرکەفتیترە ژ زەلامی.
چیمەن ڕەشید، چاکڤان و بەرپرسا ڕێکخراوا ژیندا بۆ ڕۆژنامەیا ئەڤرۆ دیارکر کو نها ڕێژەیا کارکرنا ئافرەتێ بگشتی باشترە و گۆت: مە ژی وەکو ڕێکخراو گەلەک هاریکاریا ئافرەتان کریە داکو ببنە خودان پڕۆژەیێن بچووک، ئافرەت ژی حەز دکەت ببیتە خۆدان کار، چۆنکی نوکە دامەزراندن نینە و خودان کۆمپانی ژی نەشێن هەموویان بدەنە کاری، لەوما ئافرەت حەز دکەت کار بکەت هەتا ب ئونلاین و لمال.
چیمەنێ د بەردەوامیا ئاخفتنێن خۆدا دیار کر کو جاران ئافرەت د کارێن بازرگانی دا سەرکەفتیترە ژ زەڵامی، ژبەرکو ئافرەت پتر دشێت کارگێریێ بکەت و شیان هەنە د هەموو ئاستان دا کار بکەت و گۆت: نوکە جڤاک ژی گەلەک یێ هاریکارە، لێ هەکە خێزان یا هاریکار بیت دێ ئافرەت پتر شێت د کارێ خۆدا سەرکەفتنێ ئینیت.
ڕۆژڤین خەلیل ئافرەتەکا خۆدان کارە سەبارەت هەمان بابەت دیار کر، هەر د بنیاتدا بازرگانی کارەکێ ب زەحمەتە بۆ هەموو کەسان و خەبات و قوربانیدان بۆ دڤێن و گۆت: بۆ ئافرەتێ ئەڤ کارە بزەحمەتترە، ژبەرکو ئەو خودان ئەرکەکێ دییە ژی ئەو ژی ب ڕێڤەبرنا مالێ و خێزانێ یە.
ڕۆژڤینێ ئەو چەندە ژی گۆت: هەر ژ دەسپێکێ دەما من کار کری چ ڕێگری نەبون، ژبەرکو خێزانا من و دەوروبەر گەلەک د هاریکار بون دگەلمن، بتنێ من هندەک ئاستەنگێن ماددی هەبون، لێ ئەوژی چارە بون، لەوما پەیاما من بۆ هەر ئافرەتەکێ ئەوە کو ژ بۆ هەر کارەکی دەستان نەداهێلیت و بزاڤان بکەت بگەهیتە ئارمانجێن خۆ.
