کارگەھێن بەفرێ 20% ژ پێدڤیێن تەزاندنا ئاڤا دھۆکێ دابین دکەن
ئەڤرۆ نيوز، نەوزاد ھلۆری:
ھەر چەند تەکنولوجیا پێشکەفتیە و کارەبا و ئاڤتەزینک دەرکەفتینە بەلێ رۆژانە کارگەھێن چێکرنا بەفرێ ل دھۆکێ ب رێژا 20% ژ پێدڤیێن وەلاتی و بازارێن دھۆکێ بو ئاڤا سار دابین دکەن.
رەیان محەمەد خودانێ کارگەھا رەیان یا چێکرنا بەفرێ ل دھوکێ بۆ ئەڤرۆ نیوز گۆت: (ل سالا 2002 بەری ئازادیا عیراقێ کارگەھێن بەفرێ ل دھوکێ ھاتینە چێکرن کو ئەو ژی دوو کارگەھن ، و ھەتا نھا ژی ئەو ھەردوو کارگەە لسەر کارێ چێکرنا بەفرێ بو وەلاتی و خودان بازاران بەردەوامن، ل دەستپێکا درۆستکرنا کارگەھێ ھەتا چەند سالان بەری نھا رۆژانە ھزار و 800 قالبێن بەفرێ دھاتنە چێکرن بەلێ پشتی درۆستبوونا قەیرانا دارایی و باشبوونا کارەبێ و دەرکەفتن ئاڤتەنگین و بەفرگر و نزمبوونا پلەیێن گەرمایێ نھا رۆژانە دناڤبەرا 300 بو 400 قالبێن بەفرێ دھێنە چێکرن کو ئەو ژی دبیتە رێژا 20% یا چێکرنا بەفرێ بو وەلاتی و بازارێن پارێزگەھا دھۆکێ).
زێدەتر گۆت: ( چەند دنیا پێش بکەڤیت و کارەبا ھەبیت و پلەگیێن گەرمایێ بھێنە خوارێ ژی بەلێ دیسان وەلاتیان و بازاران پێدڤی ب بەفرێ ھەیە ژبەرکو چێکرنا بەفرێ ژلایێ وەلاتیان و خودان بازاران یا سنوردارکریە و ئەم بوشایا ئەوان بو پێدڤی یا بەفرێ تەژی دکەین، بۆ نموونە خودان مارکێت و بازارێن مەزن و بازارێن چێکرنا شیریناھیان و تەزیاتی و دیسان بەھی و ھندەک جاران ژی داوەتانو گەلەک کارێن دن پێدڤی ب بەفرێ ھەیە و ئەگەر بەفر نەبیت ل وی دەمی ئەو دێ مینن مەحتل).
ناڤبری د درێژاھیا ئاخفتنێن خودا دیارکر ژی کو ھەر قالبەکێ بەفرێ 25کگم و شیان ھەنە بو دەما 24 دەمژمێران ل بەر ھەتاڤێ خوە بگریت و گۆت ژی: (یا گرنگ ئەوە کو بەفر نەھێتەدانان ل بەر ھەوای و ھەردەما ھەوا گەھشتێ دی َحەل بیت بەلێ ب ھەتاڤێ حەل نابیت، نھا ئەم قالبێ بەفرێ ب شێوەیێ کوم ب ھزار دیناران دفروشین و ب شێوەیێ تاک ب ھزار و 500 دیناران).
خودانێ کارگەھا رەیان یا چێکرنا بەفرێ زێدەتر گۆت: (پرانیا بەفرا ل دھوکێ دھێتە چێکرن ھەر ل نافخوەی یا دھۆکێ دھێتە فروتن و رێژەیەکا گەلەک کێم دچیتە دەرڤەیێ سەنتەرێ باژێرێ دھۆکێ ، ھەموو ئەو کاروبارێن کو ل ڤێرە ئەم دکەین لژێرچاڤدێریا لایەنێن شولەژێ یە و ھەموو رێنمایێن ساخلەمیێ بەرچاڤ وەردگرین و ئەو ئاڤا ئەم بکاردئینین ئاڤا نورمالە و تێکەلی حەبکێن کلوری دکەین).
