کار بۆ دستوورەکێ نوو ل تورکیا دهێتە کرن
چاڤدێرێن سیاسی دیار دکەن پشتی سەرکەفتنا ئەردۆغانی د هەلبژارتنان دا نها ئەردۆغانی دڤێت دستوورێ تورکیا بگوهۆڕیت، چونکی دستوورێ نها یێ تورکیا بەرهەمێ کۆدەتایا سالا ١٩٨٠ یە و ئەو یەک بوویە ئاستەنگ ل هەمبەر گەلەک کارێن دەولەتێ، هەکە دستوورێ نوو یێ دیموکراتی بیت ئەو یەک د بەرژەوەندیا کوردان دایە.
رەجەب تەیب ئەردۆغانێ سەرۆک کۆمارێ تورکیا حەفتیا بۆری د داخۆیانیەکێ دا بۆ دەزگەهێن راگەهاندنێ دیار کر، دستوورێ نها یێ تورکیا بوویە ئاستەنگ ل هەمبەر پێشڤەچوونا وەلاتی، چونکی دستوورێ نها یێ تورکیا بەرهەمێ کۆدەتایا سالا ١٩٨٠ یە و پێدڤیا تورکیا ب دستوورەکێ نوو و دیموکراتی هەیە، دڤێت وەلاتیێن تورکیا دستوورەکێ هەلبژێرن کو ببیتە گەرەنتیا ژیانا وان، ژ بەر هندێ ژی ئەو کار بۆ دستوورەکێ نوو دکەن و دڤێت ئۆپۆزسیۆنا تورکیا ژی پشتەڤانیێ ل بزاڤێن حوکمەتێ بکەت.
ل ئالیێ دی بەرپرسەکێ پارتیا کۆماریا گەل ژی راگەهاند، بێگومان پێدڤیا تورکیا ب دستوورەکێ نوو و دیموکراتی هەیە، لێ ئاکپارتیێ دڤێت ل گۆر بەرژەوەندیێن خوە گوهۆرینان د هندەک خالێن دستووری تورکیا دا بکەت، ژ بەر هندێ ژی وان هەتا نها پشتەڤانی ل بزاڤێن ئاکپارتیێ یێن بۆ دستوورەکێ نوو نەکرینە، بەری هەر تشتەکێ دڤێت ئەردۆغان و ئاکپارتی نیەتا خوە ئاشکرا بکەن، دڤێت گەلێ تورکیا بزانیت کا ئاکپارتیێ دڤێت دستوورەکێ چاوا بۆ تورکیا ئامادە بکەت، هەکە براستی ژی ئاکپارتیێ دڤێت دستوورێ نوو یێ دیموکراتی بیت ئەو دێ پشتەڤانیێ لێ کەن.
چاڤدێرێن سیاسی ل تورکیا و باکورێ کوردستانێ ژی دیار دکەن، د دستوورێ نها یێ تورکیا دا چو تشتەک بۆ کوردان نینە، ژ بەر هندێ ژی دڤێت کورد پتر ژ هەر کەسەکێ پشتەڤانیێ ل گوهۆرینا دستوورێ نها بکەن، دڤێت کورد پشتەڤانیێ ل بزاڤێن ئەردۆغانی و ئاکپارتیێ بۆ دستوورەکێ نوو بکەن، لێ دڤێت د هەمان دەمی دا هندەک ژ مافێن گەلێ کورد د دستوورێ نوو دا بهێتە گەرەنتیکرن، دڤێت د دەستووری دا هەبوونا کوردان ل تورکیا ب فەرمی بهێتە قەبوولکرن و هەروەسا دڤێت چو ئاستەنگی ل هەمبەر پەروەردا ب زمانێ کوردی نەهێتە دروستکرن.
ل گۆر باوەریا چاڤدێرێن سیاسی هەکە دستوورێ نوو یێ تورکیا دستوورەکێ مودێرن و دیموکراتی بیت دێ کورد ل تورکیا گەهنە گەلەک مافێن خوە، چونکی دستوورەکێ نوو دێ گەلەک دەرگەهێن نوو بۆ کوردان ڤەکەت و کورد دشێن ب رێیا خەباتا سیاسی بگەهنە گەلەک مافێن خوە، ژ بەر هندێ ژی دڤێت کورد پشتەڤانیێ ل ئامادەکاریێن بۆ دستوورەکێ نوو ل تورکیا بکەن و د هەمان دەمی دا دڤێت هەموو هێزێن کوردی ل تورکیا پێکڤە کار بکەن دا د دستوورێ نوو دا مافێن کوردان بهێنە گەرەنتیکرن، ئەو یەک ژ بۆ کوردان ل تورکیا و باکورێ کوردستانێ گەلەک گرنگە.
