کار بۆ چارەسەرکرنا پرسێن د ناڤبەرا کوردان و شامێ دا دکەین
پەیڤدارا وەزارەتا دەرڤە یا رۆسیا راگەهاند، هەتا نها ژی شامێ ب فەرمی هەبوونا رێڤەبەریا خوەسەر ل باکورێ سووریێ قەبوول نەکریە، لێ نوونەرێن مە کار دکەن دا پرسێن هەی د ناڤبەرا رێڤەبەریا خوەسەر و شامێ دا بهێنە چارەسەرکرن.
ماریا زاخارۆڤا پەیڤدارا وەزارەتا دەرڤە یا رۆسیا سەبارەت ب رەوشا سووریێ راگەهاند، نها ل گەلەک دەڤەرێن سووریێ رەوشەکا ئارام هەیە، لێ مخابن هەتا نها ژی ئەمریکا ب بەهانەیا شەڕێ ل دژی داعشێ نەڤێت هێزێن خوە ژ ئاخا سووریێ ڤەکێشیت و هەموو قانوونێن نێڤدەولەتی ژی بنپێ دکەت، وەکو رۆسیا مە بەری نها چەندین جاران دیار کریە کو دڤێت ئەمریکا و هەموو وەلاتێن دی هێزێن خوە ژ ئاخا سووریێ ڤەکێشن دا کار بۆ چارەسەرکرنا قەیرانا نها ل سووریێ بهێتە کرن.
پەیڤدارا وەزارەتا دەرڤە یا رۆسیا سەبارەت ب دەستپێکرنا قۆناغەکا نوو د ناڤبەرا سووریێ و تورکیا دا ژی دیار کر، وەکو رۆسیا ئەو پشتەڤانیێ ل دەستپێکرنا قۆناغەکا نوو د ناڤبەرا تورکیا و سووریێ دا دکەن، وان پێ باشە هەر دو وەلات دەست ب دانوستاندنان بکەن و هەموو پرسێن هەی د ناڤبەرا خوە دا چارەسەر بکەن، ژ بۆ ڤێ یەکێ ژی دڤێت هەر دو ئالی مەرجێن گران بۆ هەڤدو دیار نەکەن، چونکی ئەو یەک ئاستەنگیان ل هەمبەر دەستپێکرنا قۆناغا دانوستاندنان د ناڤبەرا هەر دو ئالیان دا دروست دکەت.
سەبارەت ب پرسا کوردی ل سووریێ ژی ماریا زاخارۆڤا دیار کر، نها ل باکورێ سووریێ ل وان دەڤەرێن کو پڕانیا ئاکنجیێن وێ کوردن رێڤەبەریا خوەسەر هەیە، لێ هەتا نها شامێ ب فەرمی هەبوونا وێ رێڤەبەریێ قەبوول نەکریە، نوونەرێن مە ل سووریێ نها کار دکەن دا شام و رێڤەبەریا خوەسەر پرسێن هەی د ناڤبەرا خوە دا ب رێیا دانوستاندنان چارەسەر بکەن، ژ بۆ ڤێ یەکێ ژی کارێن پێدڤی دهێنە کرن، چونکی وەکو رۆسیا مە پێ باشە پرسا کوردی ل سووریێ بهێتە چارەسەرکرن، چونکی هەتا پرسا کوردی ل سووریێ نەهێتە چارەسەرکرن دێ ئالۆزیێن هەی ژی بەردەوام بن، ژ بۆ ئارامیا رەوشا سووریێ وەکو رۆسیا ئەم کار دکەین و مە پێ باشە ئەمریکا و وەلاتێن دی ژی ئاستەنگیان دروست نەکەن و گۆت: (ب چارەسەرکرنا پرسا کوردی ل سووریێ دێ گەلەک ئاریشێن دی ژی هێنە چارەسەرکرن، لێ تورکیا ژی هندەک نێرینێن خوە هەنە، چونکی تورکیا هەبوونا هەرێمەکا کوردی ل باکورێ سووریێ وەکو مەترسیەکا مەزن ل سەر ئاسایشا خوە دبینیت، دڤێت ب رێیا دانوستاندنان و بەرچاڤ وەرگرتنا نێرینێن تورکیا ئەم بشێین پرسێن هەی چارەسەر بکەین، لێ مخابن ئەمریکا و هندەک وەلاتێن دی ب جهێ چارەسەریێ بەردەوام ئالۆزیان دروست دکەن، چونکی وان نەڤێت قەیرانا نها ل سووریێ بهێتە چارەسەرکرن).
