کرین و فروتنا گۆلچیسکان بۆچی دھێتەکرن ھەکە نەیا قانوونی یە
ئھڤرۆ نیوز:
قانوونێ کرین و فروتنا پارچەیێن لەشێ مرۆڤی ب ئێکجاری قەدەغەکریە و کریە تاوان و سزایێن گران بو وان کەسان داناینە، لێ زور جاران مە گوە لێ دبیت یان دبینین کۆ گولچیسک دھێنە کرین و فروتن و ئەو کەسێن ڤی کاری دکەن ناھێن سزا دان، پارێزەرەک دیار دکەت کو ئەو کەسێن ڤی کاری دکەن ل ھەمبەری دادگەھێ دبێژن ئەڤ کارێ مە بێ بەرامبەرە و خوبەخشییە بو ھندێ نەھێن سزادان.
پارێزەر یاسین حەسەن باکورمانی بۆ ئەڤرۆ دیارکر کو گۆلچیسک دھێنە ڤەگوھاستن و پڕانیا جاران ژی ئەڤ کارە ب نھێنی دھێتەکرن و گۆت: ھەر کارەکێ زیانێ ب تاکەکەس و جڤاکی بگەھینیت دانەرێن قانوونان قانوونەک تایبەت ب وان کاران دەرکریە و قەدەغەکرینە و کرین و فروتنا پارچەیێن لەشێ مرۆڤی ژی قانوونا خوە ھەیە ئەو ژی( ڕێکخستنا چاندنا پارچەیێن مرۆڤی و قەدەغەکرنا بازرگانیکرن ب وان ) کۆ سزا بو وان کەسان ھاتیە دیارکرن یێن ڤێ جورە بازرگانیێ دکەن، گۆتژی قانوونێ سزایێن توند دانایینە بو وان کەسێن ڤێ جورێ بازرگانیێ دکەن ژ زیندانێ ھەتا زیندانکرنا ھەتا ھەتایێ و غورامە ژی ژ ملیونەک دینارێ عیراقی ھەتا چل ملیون دیناران زێدەتر نەبیت و ھەروەسا بو دادگەھێ ژی ھەیە وی کەسی ژ کاری وی دووربکەت ھەتا ماوێ پێنج ساڵان و ھەروەسا ئەو نەخوشخانا ئەڤ تاوانە تێدا ھاتیە ئەنجام دان بھێتە دائێخستن کو ژ سێ ساڵا کێمتر نەبیت و ژ پێنج ساڵان زێدەتر نەبیت و وەرگرتنا روخسەتا کاری ژ وێ نەخوشخانێ ژی .
پارێزەر یاسین حەسەن خویاکر ژی کو زور جاران کەسەک دێ تووشی نەخۆشیا گولچیسکان بیت لێ خێزانێن ڤی نەخۆشی دێ ھەموو بزاڤان کەن بو دەست کەفتنا گولچیسەکەکێ و ب کوژمەکێ مەزنێ پارەی ژی بیت ل کوردستانێ ژی ئەڤ بازرگانیە ھەیە، لێ پشتی ھاتنا ئاوارێن سوریا ئەڤ چەندە زێدەبوویە و ئەڤ کەیسە دھێن دیتن ل دادگەھان و دھێنە سزادان، لێ پڕانیا وان ژی ڤی سزای بێ بەھر دبن ژبەرکۆ فێلێن قانوونی دکەن، چونکو ھەردوو لایەن ل ھەمبەری دادگەھێ دبێژن ئەڤ گولچیسکە بێ بەرامبەرە ژبەرکۆ ئەگەر ب بەرامبەر بیت دێ ھێن سزا دان.
زێدەتر گۆت: پێتڤیە ھەر کەسەک بەری ژیانا وی ب دووماھی بھێت بێژیتە کەس و کارێن خوە کۆ پارچەیێن لەشێ وی بکەن خێر بو کەسێن پێدڤی پشتی ئەو ژیانا خوە ژ دەست بدەت، ل وی دەمی دبیتە ئەگەر کۆ بازرگانی ژی ب پارچەیێن لەشی مرۆڤی کێم ببیت، گۆتژی نابیت چ جھەک ھەبیت بو دەرئینان و چاندنا پارچەیێن لەشێ مرۆڤی ب تنێ ئەو نەبن یێن وەزیرێ تەندروستیێ و لیژنا بلند یا تەندروستیێ موولەت دایێ.
ل دووماھیێ پارێزەری ئاشکراکر کو بازرگانی کرن ب پارچەیێن لەشێ مرۆڤی یا ھەی لێ یا کێمە، ئانکۆ ل بەراورد وەڵاتێن جیھانێ یا کێمە و پڕنیا وان بێ بەرامبەر ڤی کاری دکەن، لێ بێ بەرامبەر ژی پێدڤیە ژیێ وی ل 18 ساڵیێ کێمتر نەبیت و خێزانا وی کەسی ڕەزامەندیێ دەرببریت ل سەر و ژلایێ لێژنا پزیشکی ڤە بھێتە دیارکرن کۆ چ زیان پێ ناکەڤن و نابیتە مەترسی ل سەر ژیانا وی پشتی دەرئینانا گولچیسکا وی.
