کـورتـە چیڕۆك
نڤیسین: زییا جبێلی
گۆڕستان
«نەصیر» ی دەوسەك ل پشت خۆ، دهێلا ئاماژە ب وی دكر.یێ ڕویس بوو، پرتكی بوو، دەمێ مریان دیتی یێ هاڤێتی ل سەر گۆڕەكێ مەزن ل گۆڕستانا جیهانێ، و ژ وێ ڕۆژێ ئەو هەما ل جهەكی بڕوینیت، یان دبەڕا بچیت مرۆڤ دێ شێت ئاخا ل پشت خۆ دهێلیت بینیت، ئاخەكا تەڕا سۆركری و خەمگین، مرنا مریا ل وا دتێكدا. دیاردەكا نامۆ بوو، بەرێ ل جیهانا مریان چێنەبوویە، ئەوێن ژ بلی كفنا، چی یێ دی دگەل خۆ نا ئینن ژ ژیانێ، تنێ (نەصیر) نەبیت ئەوێ هێژ ئاخێ دكەتە جهێن ل پشت نەبوونێ، ئەوا كو مری چ ل بەرانبەر نا بینن، تنێ بەرسڤدانا وی، و پرسیارا كارێ وی بكەن ل دونیایێ، و وی ئەڤ ئاخە هەمی ژ كیڤەیە. وی دەمی گۆتە وان و ب كزگریۆك دا خەندقینیت؛
« ئەز سەرباز بووم و ئەڤە ئاخا وەلاتی یە».
بەر
دەمێ وێ ڤیای ڕاگریت، دا ژ دینیاتیا خر ڤەبیت و بەس دویڤ وێ ڕا ب چیت ل هەر جهەكی، لێ حەیتاند:
«هەتا كەنگی دێ هۆ كەیە، هە؟!»
جا ب دلنیایی یا دلدارەكی بەرسڤ دا:
«هەتا دوماهیا عەمری»
وێ گۆت: «دێ ڕۆژەكێ ب من هەلنگڤی»
:»دێ كەڤمە سەر تە!» بەرسڤا وێ دا
وێ گۆت: «دێ گەلەك گری» و د ڕامانا هندێ نەگەهشت.
ل وەغەرا خوو بەردەوام بوو، ول دویڤ دەوسا وێ، بۆ سالێن درێژ، هەتا ژ هێزێ كەتی و پشتا وی خویل بووی و پیراتیێ سەرێ وی سپیكری، و ل دوماهیێ ب بەرەكی هەلنگفت د ڕێكێ دا، و ئەردەكێ سست ئەو ڤەگرت، بێهنا مرنێ ژێ دهات، و دەمێ باش سەحكریە بەرێ هەلنگفتنێ ب چاڤێن خۆ یێن كویر، دیت كو كێلیا گۆڕەكی یە، ناڤێ وێ لسەر هاتبوو نەخشاندن.
دەقدان
سەربازێن هەڤكارێن «ویسام»ی، شییان پەیڤا ئێكێ ب خوینن، ئەوا ل سەر سینگێ خۆ دەقدای بەری بێتە كوشتن، و ئەو ژی پەیڤا «من دڤێت» ل دەمەكی كو هێژ پەیڤا دوویێ یا نەپەنی یە، جا گولـلە د پشتڤە د دلێ وی ڕا چوو بوو، و تەنەك ژ سینگێ وی هەلقاند بوو، پەیڤا دی دگەل هندا بوو. بۆ كەسوكارێن وی ل باشۆری بر، چەوا تابوت ڤەكر، ژنەكا سەركۆل ب جلێن ڕەش، خۆ هاڤێتە سەر
سینگێ وی. وێ گاڤێ وان زانی كو وی دەیكا خۆ دڤیا.
سەیران
ل ڕۆژەكێ، ژنەكێ دگەل زارۆكێ خۆ یێ ئێك سالی مەیموونكەك و كورێ وێ یێ بچویك دیتن، د ڕكەكا مەزن دا دگرتی بوون، و د پێشاندایی بینەران بوون، ل باخچەیێ گیانەوەران. ژنێ و مەیموونكێ، زارۆكێن خۆ هەلگرتبوون، هەر ئێك ژ وان ب تلا شەهدێ، ئاماژە ب یا دی دكەت، و تشتەكی دبێژتە كوڕێ خۆ، د گڕنژین یان د كەنین ل وێ گاڤێ، د هەوڵەكا دیار دا، كو خۆشیێ بۆ هەردو زارۆكێن خەمگین چێكەن.
– «سەحكێ فریشتەیێ من.. مەیموونك ب چاڤێ دەیكا خۆ خەزالە» ژن دبێژیت و دكەنیت.
-«سەحكێ خەزالێ من.. مرۆڤ ب چاڤێ دەیكا خۆ فریشتەیە» مەیموونك دبێژیت، ددانێن خوو یێن زەر دیار دكەت، و پڕ دەڤێ خۆ دكەنیت.
ژ كۆمەلا چیڕۆكان (ئاشێن بای ل بەسڕا نینن) یا ڕۆماننڤیس و چیڕۆكنڤیسێ عیراقی زییا جبێلی ژدایكبوویێ سالێن حەفتێیانە، ب ڤێ كۆمەلێ خەلاتێ كۆربەندێ چیڕۆكا كورت یا عەرەبی ل سالا ٢٠١٨ بدەسڤەئینا و چەندین خەلاتێن دی ژی وەرگرتینە. ژ گرنگترین پەرتۆكێن وی: (نەفرەتا ماركیز)، (دێ چ كەین بێی كالڤینو)ی، (باخچەیێ بیژنا).
وەرگێڕان ژ عەرەبی: عەدنان ئەحمەد مزووری
