کـورد روویێ گـەش یێ رۆژهـەلاتـا نـاڤینن
ئەڤین بارزانی
د دەمەکێ دا کو ل گەلەک وەلاتێن پێشکەفتی یێن جیهانێ پێکڤەژیانێ تنێ درووشمە و ب کریاری زۆرداری ل گەل پێکهاتەیێن سیاسی، جڤاکی و ئایینی دهێتە کرن ل رۆژهەلاتا ناڤین ل وەلاتەکێ دگیرکری وەکو کوردستانێ پێکڤەژیان ب کریاری هەیە و ب سالانە کورد رێزێ ل هەموو پێکهاتەیێن نەتەوەیی، سیاسی، ئایینی و گرۆپێن جودا جودا دگرن و ل هەرێما کوردستانێ ب سالانە هەموو پێکهاتەیێن دی د رێڤەبرنا وەلاتی دا ل گۆر سەنگێ خوە پشکدارن. ل هەرێما کوردستانێ سەرەرای قەیرانا ئابووری و گەفێن بەردەوام یێن بەغدا لێ نها ژی ب هزاران وەلاتیێن ئیراقێ ژ بیروباوەرێن جودا جودا ب ئارامی ل ژێر دەستهەلاتا کوردی دا دژین و هەتا نها ب چو رەنگەکێ ژی زۆلم و زۆرداری ل چو کەسەکێ نەهاتیە کرن. ل ئالیێ دی نها ل رۆژئاڤایێ کوردستانێ ژی کوردان هەمان هەلوەست ل هەمبەر خەلکێ دی هەنە و ب هزاران وەلاتیێن عەرەب، تورکمان، ئاشوری و پێکهاتەیێن دی یێن ژ بەر زۆلما داعشێ و گرۆپێن چەکدار یێن توندرەو رەڤینە و نها ل ژێر دەستهەلاتا رێڤەبەریا کوردی دا ب ئارام دژین، ئەو یەک نیشا ددەت کو کورد هەردەم مللەتەک ئاشتیخواز بووینە و کوردان هەردەم بزاڤا ڤێ یەکێ کرینە ل گەل هەموو گەلێن دی یێن دەڤەرێ پێکڤە د ناڤ ئارامیێ دا بژین، لێ مخابن ژ بەر زۆلم و زۆرداریا دەستهەلاتدارێن داگیرکەرێن کوردستانێ، کورد نەچار ماینە شەڕی بۆ پاراستنا خوە بکەن. هەلوەستێ جوان یێن کوردان وەسا کریە کو نها گەلەک ژ بەرپرسێن دەولەتێن داگیرکەرێن کوردستانێ بخوە ژی ڤێ یەکێ قەبوول دکەن کو کورد بووینە روویێ گەش یێ رۆژهەلاتا ناڤین و جوانیا دەڤەرێ و پێکڤەژیانێ نیشا هەموو جیهانێ داینە، ئەو یەک ژ لاوازیا کوردان نینە، بەلکو ژ وێ باوەریێ دهێت کو ب سالانە د ناڤ دلێ هەر کوردەکێ دا هەیە و وەسا دبینن مرۆڤ خوەدانێ هەر بیروباوەریەکێ ژی بیت دشێت د ناڤ وەلاتەکێ دا پێکڤە بژین و هەر پرسەک ژی هەبیت ب رێیا دانوستاندنان چارەسەر بکەت .سەرۆک بارزانی گەلەک جاران د گۆتارێن خوە یێن پر بها دا ئاماژە ب ڤێ یەکێ کریە کو پێکڤەژیان پشکەکە ژ کەلتورێ دەولەمەند یێ گەلێ کورد و د دیرۆکێ دا هەتا نها باوەریا کوردان ب پێکڤەژیانێ هەبوویە، لێ مخابن داگیرکەرێن کوردستانێ هەردەم ل ژێر ناڤێن جودا جودا بزاڤا ژناڤبرنا گەلێ کورد کرینە، لێ ئەڤرۆکە کوردان بۆ هەموو جیهانێ سەلماندینە کا ئەو چەند گەلەک ئاشتیخوازن و دخوازن ل هەموو گەلێن دی ل دەڤەرێ د ناڤ ئاشتیێ دا بژین. ل ئالیێ دی نها بۆ هەموو وەلاتێن جیهانێ ژی ئەو یەک هاتیە سەلماندن کو هەتا کورد ل رۆژهەلاتا ناڤین نەگەهنە مافێن خوە یێن رەوا پرسێن هەی ژی چارەسەر نابن، بەرۆڤاژی گۆتنێن ب سالان یێن داگیرکەران دەمێ دگۆتن هەکە دەولەتا کوردی بهێتە ئاڤا کرن دێ رۆژهەلاتا ناڤین بیتە مەیدانا شەڕی و ئالۆزیان، لێ نها ئەو یەک هاتیە سەلماندن کو هەکە کورد بگەهنە مافێن خوە دێ رەوشا دەڤەرێ پتر ئارام بیت، دێ خەلک د ناڤ ئاشتیێ دا ژین، ژ بەر ڤێ یەکێ ژی نها سەردەمەک نوو ل رۆژهەلاتا ناڤین دەستپێکریە کو سەردەمێ کوردانە، کورد بووینە روویێ گەش یێ رۆژهەلاتا ناڤین و داگیرکەرێن کوردستانێ ژی رۆژ ب رۆژێ پتر شەرمزاری دیرۆکی دبن.
