کلتۆرێ دەڤەرا خوە دێ زیندی کەت
ئەڤرۆ، عەزیز ھەروامی:
مۆمین زەلیمی، دارتراشەکێ بەرنیاسێ دەڤەرا ھەورامانە، دەمەکێ درێژە ھەموو پێدڤیێن ناڤمالی و لێنانگەھان ب داری چێدکەت و ئەو دبێژیت: راستە جیھان یاھاتیە گوھۆڕین و بەردەوام کەرستە و تشتێ نوو دەردکەڤن ئەو بۆ کاری ژی ب ساناھی نە لێ ئەز ھەر داری بکاردئینم و مەرەما من ئەوە دا کلتۆرێ دەڤەرا خوە بلند راگرم و نەھێلیم تشتێ نوو کارتێکرنێ لێ بکەت.
ناڤھاتی گۆت: ھندەک تشت ھەنە وەک مێزە و کورسیک و گەلەک پێدڤیێن دی یێن لێنانگەھێ پێدڤیە بەردەوام ب دەستی بھێنە چێکرن دا ژ ناڤ نەچن، چنکو ل ڤان چەند سالێن دووماھی پتریا وان تشتان ب شووشەی و پلاستیکی دھێنە چیکرن، راستە دبیت ئەو پاقژتربن ھەروەسا ئەرزانتر ژی بیت، لێ ژلایێ ساخلەمیێ ڤە وان کەرستان ھەتا رادەکی زیانا خوە ھەیە، لەورا چێکرنا وان ب داری دو مفا ھەنە، یا ئێکێ دێ کلتۆرێ دەڤەرێ بەردەوام مینیت زیندی و یا دویێ ژی وەک ساخلەمی بۆ مرۆڤی گەلەک باشترە، بۆ زانین پتریا تشتێن ئەز چێدکەم ب دارێ سروشتی دھێنە چێکرن و داخوازیەکا باش ل سەر ھەیە.
