کلیپ بۆ پتر ژ ھزار سترانبێژان چێکرینە
ئەڤرۆ، زنار تۆڤی:
دەرھێنەر فەیزوللاە یلدرم، کو خەلکێ باژێرێ کەرجۆسێ یە ل باتمانێ ل باکورێ کوردستانێ و نوکە ل باژێرێ ئیستەمبولێ دژیت، د دیدارەکێ دا بۆ رۆژناما ئەڤرۆ دبێژیت: ئەڤە پتری ٢٠ سالانە ئەز کارێ دەرھێنانا کلیپان دکەم و کەسێ ئێکێ بووم ل باکورێ کوردسانێ ئەڤ کارە ئەنجامدایی و ھەتا نوکە یێ بەردەوامم، من کلیپ بۆ پتر ژ ھزار سترانبێژێن کورد و تورک یێن چێکرین.
ناڤھاتی گۆت: نوکە چو جۆداھی دناڤبەرا کلیپێن کوردی بیانی دا نینن، ھەر چەندە مە چو دەولەت نینن، لەوما کلیپێن کوردی ل دووف ئاستێ کلیپێن جیھانی ناھێنە چێکرن، ئەڤ چەندە ڤەدگەریت بۆ دەستکورتییا بارێ ژیانێ یێ ھونەرمەندێن کورد، ھەروەسا ژ بۆ پێشکەفتنا ھونەرێ کوردی ئەم ڤی کاری دکەین، و من ل بەرە فلمێن سینەمایی یێن کوری چێکەم، ھەر چەندە دەولەت گەلەک ئاستەنگان بۆ کوردان چێدکەت، لەوما چێکرنا کارێن ھونەری کارەکێ ب زەحمەتە، ھەروەسا دەمێ ئەز کلیپەکێ بۆ ھونەرمەندەکێ کورد چێکەم، ئەز ب چاڤەکێ کوردی وێ کلیپێ چێدکەم و سیناریۆیەکا باش بۆ ددانم و ل دووف دەڤەر و فولکلۆرێ ھەر دەڤەرەکێ ئەز کلیپان چێدکەم، ئەڤە ئێکە ژ کارێن گرنگ د کلیپێ دا، ھەروەسا دەولەتا تورک چەندین جاران ئاستەنگی د کارێ مە دا چێکرینە، لێ ھەر ئەم کارێ خوە ب رەنگەکێ بەردەوام ئەنجام د دەین، ھەر چەندە وان نەڤێت چو جاران کورد پێش بکەڤن، دیسان نەژاد پەرستێن تورک ژی گەلەک جاران ئاریشان بۆ مە چێدکەن، دەمێ ئەم کلیپان چێدکەین و کلیپێن کوردی ل ھەرێما کوردستانێ پێشڤەچوونەکا باش ب خوە ڤە دیتیە..
