کوخک ل دەڤ زارۆکان کەنگی جهێ ترسێ یە؟
د. عبدالرحمن عبدالله محسن، تایبەتمەندێ زارۆکان و نەخۆشیێن خوینا زاروکان، دیارکر کو کوخک ئاریشەکا بەربەلاڤە ل دەف زارۆکان و گۆت: هەر چەندە کۆخک ئێک ژ رێکێن بەرگریێ یە دژی میکروبان، بەلێ کۆخکا بەردەوام زارۆکی ماندی دکەت و بێهنا وی تەنگ دکەت.
ل دۆر ئەگەرێن کۆخکێ، دیارکر کو هژمارەکا ئەگەران هەنە، ژوانژی، پەرسیڤ و نەخۆشیێن ڤایروسی، خەندەکۆک، ئاریشێن دفنێ وەک هاندانا جیوبان، گوشتێ زێدە، حەساسیا دفنێ، رەبو و هەستیاریا سینگی، ڤەگەریانا ترشاتیا گەدەیی بو بوریا خارنێ و هلکێشانا تشتەک بیانی ب خەلەتی بو سینگی ڤە وەک مۆرک یان داندک، نەخۆشیێن وەکو قورباجە و هەودانێن گەوریێ و هەودانێن بوریێن هەناسێ و سیهان.
د. عبدالرحمن عبدالله دیارکرل هندەک دەمان پێمڤییە سەرەدانا نۆشداری بکەت ژوانژی، کۆخکا دومدرێژ ب تایبەت هەکە پتر ژ ١٠ روژا بەردەوام بوو، ماندیبوون و بێهیزی د گەل بیت، تایێن بەردەوام، هەکە زارۆک وەرارێ نەکەت د گەل کۆخکا بەردەوام، بەلغەمێ رەنگا و رەنگ د گەل بیت و هەکە کەسێن خێزانێ ئاریشێن سیها یێن دومدرێژ هەبن، یان تەنگەنەفەسی و شوینبوونا دەست و لێڤان هەبیت، یان ژیێ زاروکی ل ژێر ٦ هەیڤیێ بیت، دەنگێ نە سروشتی یێ کۆخکی وەک دەنگێ دیکلی.
ل دۆر چارەسەریێ دیارکر کو پێدڤیە ل دووڤ ئەگەری بهێتە چارەسەرکرن و گۆت: دەرمانێن راوەستندنا کۆخکێ بێ نوشداری ب کارنەئینە ب تایبەت بو زاروکێن ل ژێر ٢ سالی دا.
