کوردان هەلبژارتنەکا سەرکەفتی ئەنجام دا
دەزگەهێن راگەهاندنا جیهانێ ب گرنگی بەحسێ هەلبژارتنێن پەرلەمانێ کوردستانێ کرن و دیار کرن هەلبژارتنێن هەرێما کوردستانێ ب رەنگەکێ شارستانی و سەرکەفتی هاتنە کرن و پارتی دیموکراتی کوردستان دیسان شیا سەرکەفتنەکا مەزن تۆمار بکەت.
هه‌لبژارتنێن په‌رله‌مانێ هه‌رێما کوردستانێ د رۆژه‌ڤا وه‌لاتێن جیران و جیهانێ دا جهه‌کی گرنگ گرت و هه‌لبژارتنێن هه‌رێما کوردستانێ وه‌ک هه‌لبژارتنه‌کا سه‌رکه‌فتی و شارستانی هاتنه بناڤکرن.
د ڤێ مژارێ دا ڕۆژنامه‌یێن وه‌ک جمهوریه‌ت، سۆزجی، ئارتی گه‌رچه‌ک، گازه‌ته دوڤار، ت24، ئه‌ڤره‌نسه‌ل و ده‌زگه‌هێن راگه‌هاندنێن دی، بەحسێ ڤێ یەکێ کرن کو هەلبژارتنێن هەرێما کوردستانێ ب رەنگەکێ شارستانی و سەرکەفتی هاتنە کرن و رێژەیەکا گەلەک باش یا وەلاتیێن هەرێما کوردستانێ پشکداری د هەلبژارتنان دا کرن و هەلبژارتن بێی چو ئاریشەکێ و ب رەنگەکێ سەرکەفتی هاتنە کرن.
ل ئالیێ دی ل فره‌نسا یورۆنیوز و ل ئه‌لمانیا ژی دی زایدونگ راگه‌هاندن کو د ره‌وشا ئالۆز یا ل رۆژهەلاتا ناڤین دا، کوردان ل هه‌رێما کوردستانا عێراقێ هه‌لبژارتنه‌کا دیرۆکی ئه‌نجام دان و شیان پرۆسیسا ده‌نگدانێ و هه‌لبژارتنێ ب باشی برێڤه ببه‌ن و ئاشکرا ژی کرن کو ڕێژه‌یا پشکداریێ ل دووڤ هه‌لبژارتنا بۆری زێده‌تر بوویه و پارتی دیموکراتی کوردستان دیسان شیایە باوەریا پڕانیا خەلکێ هەرێما کوردستانێ بدەستڤە بینیت و بوویە پارتا ئێکێ ل سەر ئاستێ هەرێما کوردستانێ و ئێکەتی ژی بوویە هێزا دویێ.
ل ئالیێ دی ئاژانسێن وەکو بی بی سی و رویتەرز ژی بەحسێ ڤێ یەکێ کرن کو د رەوشەکا گەلەک ئالۆز یا ل رۆژهەلاتا ناڤین و عێراقێ دا کوردان هەلبژارتنەکا گرنگ ئەنجام دان و پارتی دیموکراتی کوردستان وەکو پارتا هەری کەڤن یا کوردان دیسان شیا سەرکەفتنەکا مەزن تۆمار بکەت و هەلبژارتن د کەشەکێ ئارام دا هاتنە کرن و چو ئاریشە ژی نەبوون.
سەبارەت ب هەلبژارتنێن هەرێما کوردستانێ دەزگەهێن راگەهاندنا کوردی ل ئۆرۆپا و باکورێ کوردستانێ ژی گرنگیەکا مەزن دانە هەلبژارتنێن پەرلەمانێ کوردستانێ و دیار کرن هەلبژارتنەکا گەلەک گرنگ و دیرۆکی ل هەرێما کوردستانێ هاتە کرن و هەلبژارتن ب رەنگەکێ سەرکەفتی هاتە ئەنجام دان و خەلکێ هەرێما کوردستانێ چاڤەرێ ڤێ یەکێ نە کو د دەمەکێ نێزیک دا کابینەیا نوو یا حوکمەتێ بهێتە ئاڤا کرن دا بشێت خزمەتا خەلکی بکەت، ژ بەر ڤێ یەکێ ژی هەموو وەلاتی چاڤەرێ نە کو کابینا نوو یا حوکمەتێ بشێت پرسێن هەی چارەسەر بکەت دا رەوشا ژیانا هەموو وەلاتیان ل هەرێما کوردستانێ باشتر لێ بهێت، چونکی هەرێما کوردستانێ گەلەک ئاریشە ل گەل بەغدا هەنە و دڤێت کابینا نوو یا حوکمەتێ بشێت پرسێن هەی ل گەل بەغدا ب رێیا دانوستاندنان چارەسەر بکەت و ژ بۆ ڤێ یەکێ ژی دڤێت کابینەیەکا بهێز ل هەرێما کوردستانێ بهێتە ئاڤا کرن.
