کچێن ئێزدی دخوازن خولێن راھێنانێن لەشکری بۆ بھێنە ڤەکرن
شێخان، بارزان مزووری:
پشتی ناڤەندا وەرزش و لاوێن شێخان خولێن جۆراوجۆر ل گوندێ ئیسیان سەر ب قەزا شێخان ڤە بۆ پتر ژ ٨٥ کچێن ئێزدی ڤەکری، ئەو کچ دخوازن خولێن سەربازی بۆ بھێنە ڤەکرن، دا کو پشتەڤان و ھاریکارێن پێشمەرگەی بن.
ئیمان جەلو، ئێک ژ سەرپەرشتێن وان کچانە بۆ رۆژناما ئەڤرۆ دیار کر کو رێوەسمێن دووماھی ھاتنا وان خولان دوھی سپێدێ ٢٠-٥ ل میحوەرێ ناوەران ھاتنە سازکرن و عەلی عەونی بەرپرسێ لقێ ٢٠ شێخان سمینارەک بۆ وان کچان پێشکێش کر و ل دووماھیا خولێ ٨٥ کچێن ئێزدی یێن گوندێ ئیسیان داخواز ژێ کر کو خولەکا مەشق و راھێنانێ بۆ وان بێتەڤەکرن بھێنە مەشقکرن و دگەل ھێزێن پێشمەرگەی پشکداری د شەڕان دا بکەن.
لوقمان شەرەفانی بەرپرسێ ھێزا ئاگری یا پێشمەرگێ کوردستانێ ل میحوەرێ ناوەران بۆ رۆژناما ئەڤرۆ دیار کر کو داخازیێن وان کچێن ئێزدی گەھشتیە وان کو دڤێت خولێن مەشق و راھێنانێ یێن سەربازی بھێنە ڤەکرن مە ژی داخوازیێن وان وەرگرتینە و بۆ جھێن بلندتر دێ ھێنە رەوانەکرن و گۆت “وان کچا سۆز دایە کو مل ب ملێ پێشمەرگەی ڤە بن و ھەر کریارەکا پێشمەرگە بکەت ئەو ژی ل گەل دھاریکاربن”.