کچ پتر ژ کوڕان گرنگیێ ب جوانکاریێ ددەن
ئه‌ڤرۆ نيوز:
جوانی تشتەکێ گەلەکێ گرنگە ل نک ھەر کەسەکی، لەما ژی تەخا گەنجان پتر ژ ھەر کەسەکی دیتر گرنگیێ ب جوانیا خوە ددەن، و ل دۆر ڤێ یەکێ تایبەتمەندەکێ دەروونی دبێژیت: ئەڤ کریارە نە پێدڤیەکا لەشی یە بەلکو یا دەروونی یە.
ژ لایێ جڤاکی ڤە زەکی سالح ڤەکولەرێ جڤاکی دبێژیت: جوانی تشتەکێ گەلەکێ گرنگە ل نک ھەر کەسەکی، بەس گەنج پتر ژ ھەر کەسەکی گرنگیێ ب جوانیێ ددەن، و ژ گەنجان ژی تەخا کچان پتر ژ کوڕان گرنگیێ ب کریارێن جوانکاریێ ددەن و گۆت: وەختێ مرۆڤ بزاڤا جوانیێ دکەت کو ب جوانترین رەنگ و جلک دەرکەڤیت ژ بۆ خەلکی یە، چونکو دێمێ مرۆڤی ملکێ خەلکی یە، نە ملکێ مرۆڤی یە، لەما گەنج حەز دکەن ب جوانترین دێم دەرکەڤیتە بەرامبەری خەلکەکی.
ژ لایێ دەروونی ڤە تایبەتمەندێ نەخۆشیێن دەروونی د. لویس کارو بەندەر دبینیت، کریارێن جوانکاریێ نە پێدڤیەکا لەشی یە بەلکو پێدڤیەکا دەروونی یە و گۆت: بابەتێ جوانکاریێ چاڤلێکرنەکا کەڤنە ل نک مرۆڤی ھەر ژ مێژە ھەبوویە، بەلێ دڤی دەمی دا ل نک گەنجان ئەڤ تشتە بوویە دیاردەیەکا جیھانی.
ڤەکولەر زەکی ئەو چەندە ژی نەڤەشارت کو دەمێ مرۆڤ ھەست دکەت کو رەنگێ مرۆڤی یێ جوان نینە بەرامبەری خەلکێ، مرۆڤ ھەست ب کێماسیەکێ دکەت و گۆت: لەما دەما مرۆڤ بزاڤێ دکەت کریارەکا جوانکاریێ بو دێمێ خوە بکەت، بۆ ھندێ یە کو ب جوانترین تشت خوە نیشا کەسێن بەرامبەر ددەت و باوەریا وی پتر ب کەسایەتیا وی موکم دبیتن.
ل دوماھیێ ژی د. لویس خۆیا کر، گەنج وەسا ھزر دکەن دەما دەردکەڤیت چاڤێ دەوروبەرا ھەموویێ ل وی یە، ئەڤجا دەما خوە رێک و پێک دکەت ل سەر کەسایەتیا خوە یا ژ دەرڤە ھەست پێ دکەت کو ئەو ب خوە جھێ بەرێخودانێ یە و گۆتژی: جوانکاریێ گەلەک کارتێکرنا خوە ھەیە وەختێ مرۆڤ گورانکاریەکێ دکەت ل کەسایەتیا خوە دەروونی مرۆڤی خوەش دبیت و مرۆڤ ھەست ب ئارامیەکا دەروونی دکەت.
