کۆمپانیەکا راپرسیان: ئاکپارتیێ نەڤێت ئەڤسالە ل تورکیا هەلبژارتن بهێنە کرن
ئەڤرۆ
سەرجان مەحمود
که‌مال ئۆزکیراز به‌رپرسێ کومپانیا ئاڤراسیا یا راپرسیان د داخۆیانیەکێ دا بۆ دەزگەهێن راگەهاندنا تورکیا دیار کر، کو پشتی بیڤلەرزا ڤێ دووماهیێ ل تورکیا ده‌نگێ هه‌ڤپه‌یمانیا جمهور یا کو ژ ئاکپارتیێ و پارتا بزاڤا نه‌ته‌وه‌په‌رست یا تورکیا پێک دهێت نێزیکی شه‌ش خالن کێمتر بوویه، نها ده‌نگێ هه‌ڤپه‌یمانیا جمهور نێزیکی 31% و وه‌لاتیێن تورکیا ژ به‌ر بێ سه‌روبه‌ریا د خه‌باتا رزگارکرنا خه‌لکی دا ل دەڤەرێن کو بیڤەلەرزە روو دای گه‌له‌ک ژ ئاکپارتیێ توورە نە، باوه‌ریا وان ب ده‌ستهه‌لاتا ئه‌ردۆغان نه‌مایه و بۆ ڤێ چه‌ندێ نها ئاکپارتی و هەڤپەیمانا خوە ئانکۆ پارتا بزاڤا نەتەوەپەرست ل رێیەکێ دگەرن دا کو بشێن هەلبژارتنان پاش بێخن، ژ بەر هندێ ژی هەڤپەیمانیا مللەت هەر زوو هەلوەستێ خوە دیار کر و سەرۆکێ پارتا کۆماریا گەل راگەهاند ژ بلی رەوشا شەری کەس نەشێت ل تورکیا بەحسێ پاشئێخستنا هەلبژارتنان بکەت.
ناڤهاتی ئەو یەک ژی راگه‌هاند، کو بیڤەەلەرزێ گەلەک راستیێن ده‌ستهه‌لاتا ئه‌ردۆغانی بۆ رایا گشتی یا تورکیا ئاشکرا کرن، راستیێن نها ب تەمامی ل دژی ئاکپارتیێ نە، ئانکۆ ب کورتی بیڤەلەرزە و ئەنجامێن وێ و ئەو زیانێن کو گەهشتنە تورکیا د راستی دا مرۆڤ دشێت بێژیت کو زیانا سیاسی هەر زێدە بۆ ئاکپارتیێ هەیە و گۆت: (پڕانیا خوه‌دانێن کۆمپانیێن دروستکرنا ئاڤاهیان کەسێن نێزیکی ئاکپارتیێ نە، وان ژی کارێ خوە ب دروستاهی نەکرینە، بەری بیڤەلەرزێ ژی چەندین جاران بسپۆران هۆشداری دابوون، کو دڤێت دەولەت دەست ب هندەک پێرابوونان بکەت و مخابن چ نەهاتە کرن، ژ بەر هندێ ژی نها هەکە هەلبژارتن ل تورکیا بهێنە کرن د بەرژەوەندیا ئاکپارتیێ دا نابیت).
که‌مال ئۆزکیراز د دووماهیا ئاخڤتنا خوه دا ژی راگه‌هاند نها ده‌ستهه‌لات ب فه‌رمی به‌حسێ 41 هزار مریان و 130 هزار برینداران دکه‌ت، لێ د راستی دا هژمار گەلەک زێدەترە و گۆت: (خالا دی ژی هەر کەس دزانیت رێژەکا گەلەک باش هاریکاری ژ هەموو وەلاتێن جیهانێ هاتنە تورکیا، لێ وەکو پێدڤی ل سەر خەلکێ لێقەومی نەهاتینە دابەشکرن، دیارە ل وێرێ ژی گەندەلی هاتیە کرن، خەلک ژ وێ رەوشێ گەلەک توورە نە، ڤێجا ژ بەر ڤان خالان هەموویێ نها ئاکپارتی نەڤێت هەلبژارتن بهێنە کرن، چونکی ئەو باشتر ژ هەر کەسەکێ دزانن هەکە نها هەلبژارتن بهێنە کرن دێ دەنگێ وان گەلەک کێم بیت).
