کۆمێن چه‌کدار د حه‌فتیه‌کێ دا 20 کورد ل عه‌فرینێ ڕه‌ڤاندن
ب، سه‌رجان مەحمود:
ل باژێرێ عه‌فرینێ یێ رۆژئاڤایێ کوردستانێ کو نها ل ژێر کۆنترۆلا کۆمێن چەکدارێن سەر ب تورکیا دایە، کریارێن ڕه‌ڤاندن، ده‌ستدرێژیا ل سه‌ر ژنان و زۆرداریا ل سه‌ر کوردان به‌رده‌وام دکه‌ت. کۆمێن چەکدار ب گه‌فێن خوه دخوازن هه‌موو کوردان ژ عەفرینێ دەرخینن و هێزێن ده‌وله‌تا تورکیا ژی ل دژی وه‌لاتیێن کورد ل ده‌ڤه‌رێن داگیرکری پشته‌ڤانیا کۆمێن چەکدار دکەن.
ل دووڤ زانیاریێن هه‌رێمی ل حه‌فتیا بۆری کۆما چەکدار یا ب ناڤێ سولتان سلێمان شاه ل ناڤه‌ندا عه‌فرینێ و قەزا ماباتا و جندریسێ بیست وه‌لاتیێن کورد ڕه‌ڤاندینه و ب توندی ئەشکەنجە داینە، نها ژی ژ بۆ ئازادکرنا وان کەسان داخوازا پارەکێ زۆر ژ کەسوکارێن وان دکەن. ل دووڤ ئاخڤتنێن مالباتێن که‌سێن ڕه‌ڤاندی، کۆمێن چەکدار دیار کرینە هەتا ئەو پارێ کو دخوازن وەرنەگرن وان کەسان ئازاد ناکەن.
ئەو یەک د دەمەکێ دایە کو بەری نها ژی رێکخستنا مافێن مرۆڤی یا سەر ب نەتەوەیێن ئێکگرتی سەبارەت ب رەوشا خراب یا ل عەفرینێ و بنپێکرنا مافێن مرۆڤی ژ ئالیێ گرۆپێن چەکدار ڤە هۆشداری دابوو تورکیا و داخواز ژ دەولەتا تورکیا کربوو، کو ئێدی پشتەڤانیێ ل گرۆپێن چەکدار نەکەت.
