کینە پۆستەرێن بانگەشەیا ھەلبژارتنان د دڕینن؟
ئه‌ڤرۆ نيوز:
د ھەوا پروپاکندێن ھەلبژارتنان دا دیاردەکا نە شارستانی دھێتە دیتن ئەو ژی دراندنا وێنە و پوستەرێن بەربژارایە. پارێزەرەکێ دیار کر کو ھەر کەسێ وێنێ بەربژارەکێ ب دڕینیت دێ ھێتە سزادان بۆ ماوێ ژ ھەیڤەکێ کێمتر نەبیت و ژ سالەکێ پتر نەبیت، ماموستایەکێ زانکۆیێ ژی گۆت: مخابن ھەتا نھا قەبارێ مەزنی و بچووکیا پۆستەرا کومسیونێ نەکریە رێنمایی.
دلژین عەبدلستار فەتاح، بەربژێرا پارتی دیموکراتی کوردستان بۆ ئەڤرۆ گۆت: (ھەکە ئێکی بەربژارەک نەڤیا بلا دەنگێ خوە نەدەتێ، نەک پوستەرێ وی ب درینیت و کەربا خوە ژێ دارێژیت، ئەڤە دیاردەکا کرێتە ئانکو یێ خەلکێ خوە بێ بھا دکەن و ئەڤە ژ کێم رەوشەنبیریێ یە دانانا پوستەرا رەوشەکا جان یا دایە جاددێن باژێری).
تو وەک بەربژارەک دەمێ دبینی پوستەرەکێ تە یێ ھاتیە دراندن تو ھەست ب چ دکەی دلژینێ گۆت: (دەمێ دبینم پوستەرەکێ من یێ ھاتیە دراندن ئەز گەلەک پێ دئێشم و ھەر بەربژارەک دەمێ پوستەرێ خوە دراندی دبینیت بێگۆمان دلگران دبیت، چونکی مروڤ خوە زەحمەت ددەت پێخەمەت بچیتە ڤی جھی دا پتر بشێت خزمەتا خەلکێ خوە بکەت).
پارێزەرێ راوێژکار عسمەت عارف دوسکی بۆ ئەڤرۆ گۆت: (مە قانوونا ھەلبژارتێن ھەرێما کوردستانێ ھەیە و قانوونا پەرلەمانێ کوردستانێ ژمارە (1) د ماددێ (4) دا و برگا (4) دا خالا (1) دبێژیت ھەر کەسێ وێنێ بەربژارەکێ یان پارتەکێ ب درینیت یان سفکاتیێ پێ بکەت و سکالا ل سەر بھێتە تومار کرن ل دادگەھێ دێ ھێتە سزادان بو ماوێ ژ ھەیڤەکێ کێمتر نەبیت و ژ سالەکێ پتر نەبیت، ئەڤجا ئەڤ کەسە چ یێ پالدایی بیت ژلایێ پارتەکێ ڤە یان ب حەزا خوە ئەو کار کربیتن).
رێنجبەر جەمیل شێخو بەربژێرێ پارتی دیموکراتی کوردستان دیار کر کو خەلک ئیزعاجا خوە ژ ھندەک پوستەرا دبینیت، ژ بەر کو ھندەک بەربژارا زێدە داناینە و بێھنا خەلکی تەنگ کریە، ھەروەسا پوستەرێت ھندەک بەربژارا دھێنە دراندن نەک یێن ھەمیا و گۆت: (ھەروەسا زێدەبونا پوستەرا و بەربژارا ب شێوەیەکێ گشتی و نە رێکخستنا دانانا پوستەری ژلایێ کومسیونێ و باژێرڤانیێ ڤە ئەگەرن بۆ ئەنجامدانا ڤی کاری).
رێنجبەر گۆت ژی: (دراندنا پوستەری کارەکێ نە جوان و نە سەردەمانەیە ھەکە دو بەربژار ھەڤرکێن ئێک بن یان دو پارت ب دراندنا وێنەی مرۆڤ وی مەزن دکەت).
د. ھەوار نێروەیی، ماموستایێ زانکویێ دیار کر کو دراندنا پوستەرێن بەربژارا ل سەر جادا بۆ کومەکا ئەگەرا دزڤریت ژ وان ژی نەبۆنا کلتورەکێ رەوشەنبیری دناڤ جڤاکی دا و گۆت: (یا ژ ھەموویا گرنگتر دزڤریت بو بەربژارا بۆ خوە کو ب رەنگەکێ رێک و پێک و جوان پروپاگندێ ناکەن وێنێن خوە ل سەر جھێن تایبەت نادانن ژبەرھندێ وەلاتی بێزار و تورە دبن ژ دانانا ڤان پوستەرا).
د. ھەوار گۆت ژی: (مخابن کومسیونا ھەلبژارتنا نەشیایە رێنمایێن تایبەت دەربێخیت ژ بۆ بەربژارا کا چاوا پوستەرێن خوە دروست بکەن و قەبارێ مەزناتی و بچووکاتیا پوستەرا حەتا نھا دناڤ کومسیونێ و ھەوا ھەلبژارتنا نەبۆیە رێنمایی و ئەڤە رەخنەکا من یا توندە بۆ کومسیونا ھەلبژارتنێن ھەرێما کوردستانێ، ژبەرکو ھەکە ئەم ل سەر ئاستێ ئەوروپا سەح بکەینێ جھێن تایبەت ژ بۆ پوستەرا داناینە و نابیت ل ھەموو جھا بھێنە دانان، بەس لدەف مە بەرەلایەکا زێدە ھەیە و حەتا ژ ئەگەرێ مەزنیا پوستەری و دانانا پوستەری ل جھەکێ نەگونجایی روودانێن ترومبێلا یێن چێبوین).
د. ھەوار گۆت ژی: (ئەو رکابەریا دناڤبەرا بەربژارێن کو نوونەراتیا لایەنێن سیاسی دکەن مخابن رکابەریەکا ساخلەم نینە، دەمێ رکابەریەکا ساخلەم نەبیت ئێک ژ ئەنجامێن وێ دێ دراندنا پوستەرا بیت).
جیھاد حەمید، بەرپرسێ ھوبا راگەھاندنێ ل کومسیونا بلندا سەربەخویا ھەلبژارتنا ل دھوکێ سەبارەت دراندنا پوستەرا گۆت: (ئەم وەک کومسیون چاڤدێریا ڤێ چەندێ ناکەین، لێ دەمێ سکالایەک دھێتە دەف مە، بۆ نمونە ھەکە لایەنەک بچیت پوستەرێ لایەنەکێ دی ب درینیت ئەو ژی ھەکە ب بەلگەڤە ب سەلمینیت کو فلان لایەنی عەمدەن گروپەک ھاندایە کو بچن پوستەر و وێنێن بەربژێرەکێ لایەنەکێ ب درینن ئەم ھینگێ سەرەدەریێ ل گەل دکەین و راپورتەکێ بلند دکەین بو ئەنجومەنێ کومسیارا ل وێرە ژی بڤی رەنگی سەرەدەری ل گەل دھێتە کرن کو سزادانا وان یان غورامە کرنە یان زیندانکرن).
جیھاد گۆتژی: (ھەتا نھا چ سکالا نەھاتینە تومار کرن ئەو ژی ژ ئەگەرێ نەبونا چ بەلگا، یان بەربژێر بخۆ ئەگەرە ژبەرکو پوستەری َخوە دانایە جھەکێ نە یێ گونجایی، ئەڤجا ھاولاتی نەچار دبیت ژ کەربادا د درینیت، لێ پوستەرێن بەربژارێن زەلام پتر ژ یێن ژن دھێنە دراندن).
ئیسماعیل مستەفا، بەرپرسێ راگەھاندنا سەروکاتیا باژێرڤانیا دھوکێ دیار کر کو دراندنا پوستەرێن بەربژێرا تشتەکێ گەلەکێ کرێت و نە شارستانیە و دبیتە ئەگەرێ ھندێ کو جاران توندوتیژی ژێ پەیدا ببیتن و گۆت: (ھەر چەندە د ھەوا ھەلبژارتنا دا زێدەگاڤی دھێنە کرن ژلایێ قەوارێن سیاسی و بەربژێراڤە، لێ ئەڤ دراندنە ژی روویەکێ نە شارستانی و کرێت ددەتە باژێری ھیڤیا مە ئەوە ئەڤ دیاردە نەمینیت).
سەروەر رەزیکی، چارەسەرکارێ دەروونی دیار کر کو کەساتیا ڤان کەسا دژی جڤاکیە، لەوما دەمێ ڤی کاری دکەن خۆشیەکێ ژێ دبینن و گۆت: (ب دیتنا من پتریا وان کەسێن ڤی کاری ئەنجام ددەن ئەون یێن کەرب و کین د دلی دا یان دەمێ دبینن رێک لێ ھاتیە گرتن و نەشێن ئێکسەر کەربا خوە ژ وی کەسی دەربێخن، ئەڤجا دێ ب دراندنا پوستەری دەرئێخن).
چارەسەرکارێ دەروونی زێدەتر گۆت: (ئەڤ کریارێن ئەڤ کاندیدە دکەت مینا گرتنا رێیا خەلکی و دروشمێن بێ بنەما و ھەلبژارتنێن ئێک لدووڤ ئێک بێ کو ئەنجام بو خەلکی ھەبیت وەل خەلکی دکەت ڤێ رەفتارێ بکەن، ھەروەسا نەبونا سزایەکێ ھەم بو وی کەسێ پوستەرا درینیت و ھەم ژی بو وی بەربژاری رێیێ ل خەلکی دگریتن ئەگەرن بو ڤێ دیاردێ).
