کێ مافێ دووڤچوونا تاوانان ل رێڤەبەریان هەیە؟
بێوار حەمدی:
پارێزەرەکی دیار کر کو دەمێ ل ڕێڤەبەریەکێ سەرپێچیەکا قانوونی یان کەمتەرخەمی دهێتەکرن، دادوەر دشێت ب ڕێیا ئەندامەکێ کونترولا دادوەریێ دووڤچوونێ ل وێ ڕێڤەبەریێ بکەت.
پارێزەر نەوزاد مستەفا د دیدارەکێ دا بۆ ڕۆژنامەیا ئەڤرۆ دیار کر، د قانوونا پێڕابونێن دادگەهکرنا سزايى دا ئەوا ژمارە 23 کو ل سالا 1971 دەرچوی دگەل ڕاستڤەکرنێن وێ، د ماددێ 39ـێ دا هاتیە کو ئەندامێن کونترولا دادوەریێ ئەو کەسن یێن دووڤچوون و هاریکاریێ پێشکێش دکەن.
پارێزەری د بەردەوامیا ئاخفتنا خودا گۆت؛ “ئەندامێن کونترولا دادوەریێ ئەوێن ڤەکولینان پێشکێش دکەن ئەڤەنە (ئەفسەرێن پولیسان، کارمەندێ بنگەهی، کومیسەر، موختارێ گۆندی و گەڕەکێ د بیاڤێ ئاگەهدارکرنێ دا، ڕێڤەبەر و سەرکردە و هاریکارێن ویستگەهان یێن فروکخانە و شەمەندەفران کاردکەن، سەرۆکێ فەرمانگەهێ یان یێ بەرژەوەندیا حکومی).
پارێزەر نەوزاد ئەو چەندە ژی ئاشکرا کر، هەر کەسەکێ راسپاردى ژبۆ بجهئینانا خزمەتەکا گشتی یان ئەوێن دەستهەلاتا دووڤچونێ هەی د تاوانان دا ژبۆ ئەنجامدانا پێڕابونان لدووڤ وان مافایە یێن قانونێ داینێ و گۆت؛ “ئەڤ کەسێن مە بەحس لێکری دێ کارێن خوە لدووڤ دەستهەلاتا قانوونێ بۆ ئاشکرا کری کەن و ل ژێر سەرپەرشتیا داواکاریا گشتی، هەروەسا ژ ئالیێ چاڤدێریێ ڤە ژی هەموو ئەندامێن کونتڕولا دادوەریێ دێ ل بن چاڤدێریا دادوەرێ ڤەکۆلینێ دابن”.
