کەسێن نێرگزی وەک قوربانی خۆ نیشان ددەن
ڤەکۆلینەکا نوی نیشانەک ئاشکرا کریە کو لدەف وان کەسان هەیە یێن خودان کەسایەتیا “نێرگزی” (Narcissism).
مالپەرێ unilad ڤەکۆلینەکا نوو بەلاڤکریە و تێدا هاتیە دیارکرن کو نێزیکی 10 بۆ 15% ژ خەلکێ جیهانێ د قۆناغێن جودا یێن ژیانا خۆدا ب شێوازەکێ نێرگزی سەرەدەری کریە، بەلێ نیشانەکا هەڤپشک دناڤبەرا وان هەموویاندا هەیە کو ب ڕوونی کەسایەتیا وان ئاشکەرا دکەت.
ئەڤ ڤەکۆلینە لسەر 400 کەسان هاتیە ئەنجامدان، د ئەنجامدا دەرکەفتیە کو کەسێن نێرگزی “هەستێ قوربانیدانا وان گەلەک یێ بلندە” ئانکو هەردەم وەسا خۆ نیشان ددەن کو ئەو یێن بووینە قوربانی، یان ژی وان گەلەک قوربانی داینە پێخەمەت کەسێن دی.
هەرچەندە هەستکرن ب قوربانیدانێ د دەمێن نەخۆش و کارەساتاندا تشتەکێ ئاسایی یە، بەلێ کەسێن نێرگزی د دەمێن ئاسایی ژی دا و ب مەبەست خۆ وەکو قوربانی نیشان ددەن، ئەڤ چەندە ژی وان ژ کەسێن ئاسایی جودا دکەت.
سێرسیا بیدارد، ڤەکۆلەر ل زانکۆیا “لەیکدهێد” کو ئێکە ژ سەرپەرشتێن ڤێ ڤەکۆلینێ، دبێژیت:
“من سەرەدەری دگەل وان کەسان کر یێن پشکداری د ڤەکۆلینێ دا کری، دیار بو کو خودان ‘عەقلیەتا قوربانی’ نە. د وێ باوەرێ دابۆن کو ئەو د ناڤەندا هەموو تشتان دانە و هەردەم قوربانی بۆ کەسێن دی داینە.”
ئەو 400 کەسێن پشکداری د ڤەکۆلینێ دا کری، ژیێ وان د ناڤبەرا 18 بۆ 71 سالیێ دا بوو. پشتی زنجیرەکا هەلسەنگاندنێن ڕەفتاری و فیزیۆلۆژی، بۆ ڤەکۆلەران دیار بوو کو “حەزا خۆ نیشان دان وەک قوربانی” پەیوەندییەکا ب هێز ب سیفەتێن کەسێن نێرگزیڤە هەیە.
