کەسێ ئێکێ بوو پێشانگەە ل دھۆکێ ڤەکری
ئەڤرۆ، شاکر ئەتروشی:
ھەتا دووماھیا سالا ١٩٧٧ خەلکێ دھۆکێ ژبۆ کڕینا ترۆمبێلان دچوونە باژێرێ مووسل، ژبەرکو ل وی دەمی چو پێشانگەھێن فرۆتنا ترۆمبێلان ل ڤی باژێری نەبوون، لێ ل دەستپێکا ١٩٧٨ دھۆکیەکی ب ناڤێ (عادل ئەمین عومەر) ب ھەڤکاریا بازرگانەکێ عەرەب ئێکەم پێشانگەھا فرۆتنا ترۆمبێلان ب ناڤێ پێشانگەھا عادل یا بازرگانی ل دھۆکێ ڤەکر و نوکە ئەو پێشانگەە ژ دو تایان پێک دھێت و کور و برازایێن حەجی عەدلی ب رێڤەدبەن و شانازیێ ب وێ چەندێ دبەن کو وەک پیشە ژ بنەمالا وان دەستپێکریە.
حەجی ھشیار کو دبیتە برازایێ حەجی عادلی ئەڤ چەندە د دیدارەکێ دا بۆ رۆژناما ئەڤرۆ پشتراستکر و گۆت: ل وی دەمی مامێ مە بۆ کڕینا ترۆمبێلان د چوو مووسل، ل وێرێ کەسەکێ عەرەب ب ناڤێ (ئەکرەم ئەلعەزاوی) کو بازرگانیا کرین و فرۆتنا ترۆمبێلان کر پێشنیازەک دا مامێ مە کو پێشانگەھا ترۆمبێلان ل دھۆکێ بھێتە ڤەکرن و پشتی مامێ مە حەجی عادل ھاتیە دھۆکێ و ھزرێن خوە کرین رازی بوو، لەورا ھەر دوێ سالێ دا پێشانگەە ل دھۆکێ ڤەکر و وی بازرگانێ عەرەب ترۆمبێل ژ مووسل دئینان کو ئەو ژی لادە و لاندۆڤڕ و پۆلسکی و شۆفرلێت بوون، مامێ مە کرە ھەڤپشکێ خوە و ل ڤێرە بۆ دفرۆتن، بۆ زانین پێشانگەە ل دەستپێکێ ل نیڤا سەنتەرێ باژێرێ ھاتە ڤەکرن، کو نھۆ جھێ وێ بوویە ئۆتێلا برجینی، پشتی چەند سالان ھاتە ڤەگوھاستن بۆ تاخێ گەلی و ئەڤە چەند سالە ژی ل تاخێ پێشانگەھێن فرۆتنا ترۆمبێلایە و ژ دو تایان پێک دھێت و ھەردو تا ژلایێ برا و برازایێن حەجی عادل ڤە دھێنە برێڤەبرن.
عادل ئەمین عومەر ژدایکبوویێ سالا ١٩٢٧ بوو، ل سالا ١٩٩٧ وەغەرکربوو، بتنێ کوڕەک ب ناڤێ حەجی ئیسماعیل ھەیە.
