کەس نەشێت بێرێزیێ ب هێما و بهایێن گەلێ کورد بکەت
ئەندامەکێ پەرلەمانێ تورکیا سەر ب فراکسیۆنا دەم پارتی ب توندی بەرسڤا ئاخڤتنێن پەرلەمانتارەکێ تورکیا دا دەمێ سڤکاتی ب ئالایێ کوردستانێ کری و دیار کر بۆچی هوون رێزێ ل هەموو ئالایێن جیهانێ دگرن و سڤکاتیێ ب بهایێ کوردان دکەن.
سڕی ساکیک ئەندامێ پەرلەمانێ تورکیا ل هۆلا پەرلەمانی، ب توندی بەرسڤا پەرلەمانتارەکێ پارتا (ئی) یا تورکیا دا کو پارتەک نەتەوەپەرستە و سڤکاتی ب ئالایێ کوردستانێ کربوو و نەرازیبوونا خوە ل هەمبەر سەرەدانا سەرۆک بارزانی یا بۆ جزیرێ دیار کربوو، سڕی ساکیک دیار کر، هەوە خێرە هوون بۆچی رێزێ ل هەموو ئالایێن جیهانێ دگرن، لێ هوون سڤکاتیێ ب ئالایێ هەرێما کوردستانێ دکەن کو هەم ل ئیراقێ و هەم ژی ل هەموو جیهانێ ب فەرمی هاتیە قەبوول کرن، هوون فاشیستن و کەسێن وەکو هەوە چ ژ مرۆڤایەتیێ و رێزگرتنێ نزانن.
سڕی ساکیک د پشکەکا دی یا ئاخڤتنا خوە دا ئەو یەک ژی دیار کر، ئەز وەکو نوونەرێ کوردان ل پەرلەمانی سڤکاتیا چو کەسەکێ ل هەمبەر بهایێن گەلێ کوردستانێ قەبوول ناکەم و هەر کەس سڤکاتیێ بکەت دیارە چ ژ مرۆڤایەتیێ نزانیت و دێ ب توندی ژی بەرسڤا کەسێن وەسا بێ بها دەین و گۆت: (کورد مللەتەک مەزنن و خوەدان دیرۆکن، کوردان هەردەم ل دژی زۆرداریێ شەڕ کرینە و خوە بۆ کەسێ نەچەماندینە و نها ژی کورد یێ کار بۆ ئاشتیێ و برایەتیێ دکەن، ئەم رێ نادەین کەس سڤکاتیێ ب بهایێن گەلێ کورد بکەت، نها ئەم د قووناغەکا دیرۆکی داینە، کو ئەو ژی قووناغا ئاشتیێ و برایەتیێ یە، لێ دیارە هندەک کەسێن بێ بها وەسا دبینن هەکە ئاشتی سەر بگریت ئێدی نانێ وان دێ هێتە بڕین و ژ بەر ڤێ یەکێ ژی ئاخڤتنێن سڤک بکار دئینن، کەسێن بێ بها گۆتنێن وەسا بێ بها دبێژن و ئەم وەکو گەلێ کورد چو بهایەکێ نادەینە کەسێن وەسا).
پەرلەمانتارێ دەم پارتی ئەو یەک ژی دیار کر، هەرێما کوردستانێ هەرێمەک دستووری یە، ئەڤرۆکە ل سەر ئاستێ جیهانێ رێز ل هەرێما کوردستانێ دهێتە گرتن، چونکی ل وێرێ هەموو خەلک پێکڤە د ناڤ ئاشتیێ دا دژین، چاوا دەمێ بالیۆزێ تورکیا ل وێرێ دچیتە جهەکێ زێرەڤانێن خوە ل گەل خوە دبەت، دەمێ سەرۆک بارزانی ژی هاتە جزیرێ زێرەڤانێن وی ل گەل بوون، ئەو یەک گەلەک ئاسایی یە، لێ مخابن کەسین شوفینی هێشتا ژی هەبوونا کوردان قەبوول ناکەن، لێ ئێدی سەردەمێ ئینکارکرنا کوردان ب دووماهی هاتیە و ئەڤرۆکە ل جیهانێ هەموو بەحسێ مافێن کوردان دهێتە کرن، یێن رێزێ ل کوردان نەگرن کورد ژی رێزێ ل وان ناگرن.
