کەشتییا هیڤییان
نارین حەمید سەبیح
پێلان دەست ب کارێ خوە کر، ئادەم ژی دناڤ گێلەشۆکا هزران دا ئاسێ ببوو، ل دۆر خوە دزڤری و تەماشەی دەوروبەرێن خوە دکر، د مێشکێ وی دا هزار پەیڤ دبوونە ئاواز، ئەوی ب هێمنیڤە دگەل خوە دئاخڤت و دگۆت: ئەڤ هەمی شینکاتییا ئەز دبینم دەریایا ئارمانجا منە، یانژی ئاسمانە ئەز گەهشتیمێ و چ دی نینە ژبلی دووماهیکا من، ڕێکا من یا هەر جارە، لهیڤییا چرایەکی مە چ دەست ژی بەرەڤ منڤە ناهێن و هاریکاریا من بکەن. پێلان ژی وەکی هێسکێ ئەو دئینا و دبر و زڤڕین ژی ژوان سلبوویە. ئادەم ڤەلەرزی دەمێ ئێک ژ سویاران هەولدای دگەل ب ئاخفیت و گۆتیێ کو خەمێ دێمێ تە یێ داگیرکری، گەنجێ بەرکەفتی، تو نە ئێکەم کەسی د ڤێ کەشتیا مەزندا. ئادەمی ب مەندەهوشیڤە بەرسڤدا: کەشتی کیژ کەشتی..؟ مەرەما تە ئەڤ بەلەما بچویکە؟!
زەلامی ب هەمی باوەریڤە گۆت: بەلێ، دهزرا گەلەک ژڤان مرۆڤاندا ئەڤ بەلەمە کەشتیە بەرامبەر وان کاودانێن ئەو تێدا ژیاین، گەلەک ژوان ژی بهیڤینە بۆ دیتنا ڕۆناهییا سەرکەفتنێ و هژمارەکا وانژی دناڤ دەریا ڕەشا بێی هیڤیبوونێدا نقۆبووینە و جیاوازی ئەڤەیە.
ژ نیشکەکێڤە ئادەم دناڤ پێلان دا نقۆبوو، لدەمێ کو گەنجەکی بێی دەستی پالەک لێ دای، ئادەم ب قێری و گازیڤە بەردەوام یێ دبێژیت: من نەهێلن، هیڤییا من ژمن دویر نەکەن. هەتا کو دەنگێ زەنگا هشیارکرنێ هاتییە گوهێن ئادەمی و ژ خەونا تەعل قورتالکری.
