کەنالێ پێلستانک هاته داخستن
ئه‌ڤرۆ نيوز:
ئەڤە چەندین سالە کەنالێ پێلستانک و ھژمارەکا کەنالێن دی بێ مۆلەت کار دکەن و بەرپرسەکێ وەزارەتا رەوشەنبیری و لاوان ژی دیار کر کو کەنالێ پێلستانک ھاتیە گرتن و وان ھۆشداری دایە ھژمارەکا کەنالێن ناڤخۆ و ئاسمانی پێگیریێ ب رێنمایی و بڕیارێن حوکمەتێ بکەن.
محەمەد گەردی، رێڤەبەرێ گشتیێ چاپ و بەلاڤکرنێ ل وەزارەتا رەوشەنبیری و لاوان بۆ رۆژناما ئەڤرۆ دیار کر کو پشتی وەزارەتێ پێداچوون د مۆلەتێن دەزگەھێن راگەھاندنێ دا کری بۆ وان ئاشکرا بوو کو ھژمارەکا تەلەڤزیۆنان پابەندی بڕیارێن وەزارەتێ نەبووینە و ھندەک ژ وان ھەر بێ مۆلەت یێ پەخشێ خوە بەلاڤ دکەن، لەوڕا ژی وەزارەتێ بڕیاردایە 12 کەنالێن ناڤخۆ و ئەسمانی بھێنە گرتن، ھەتا پێگیریێ ب قانوونێ دکەن و گۆت: “ھەتا نوکە چار کەنال ھاتینە گرتن و ھەشت کەنال ژی ھاتینە ئاگەھدارکرن پێگیریێ بکەن ب مەرج و رێنمایێن وەزارەتێ بەرۆڤاژی ئەو ژی دێ ھێنە گرتن”.
ناڤھاتی ئاماژە دا وێ چەندێ کو وان کەنالێ پێلستانک یێ زارۆکان داخست ژ بەر کو بێ ھەبوونا مۆلەتێ کار دکر و گۆت: “ئەڤ کەنالە ژلایێ وەزارەتێ ڤە ھاتیە گرتن، چونکی بەری نوکە بەرپرس ل پشت بوون و دووڤ دا کەنال ھاتیە فرۆتن و ھەر بێ چو مۆلەتەک ھەبیت پەخشێ خوە بەلاڤ دکر، بەلێ مە پێڕابوون ھەمبەر وەرگرتینە و ھەر دەمێ پابەندی مەرج و رێنمایێن حوکمەتێ بیت دێ ھێتە ڤەکرن، بەرۆڤا ژی ب چو شێوەیەکی رێکێ نادەین بێ مۆلەت دەست ب کاری بکەت”.