کەڤالێن خەریبییێ
زوھێر کۆرەماکی
کەڤالێن خەریبیێن خەریبییێن تە
یا خۆ بسەر جانێ من دادای و
پەرێن من ھەمی ھلکێشان و
ھیڤییێن عەشقێ ھەمی وەراندن
رەنگێ پاییزەکا زەرپەتخی دسیمایێ مندا چاند
ئەز کرمە بەندەیەکێ چاڤەرێبوونێ
شەڤێن من کرنە نیھار و زێمار
خەم کرە قاچکێ دەڤێ من
گوھێن من وچاڤێن من..
یێن ل ڤزێنا بای و چپکێن بارانێ و
نامە و دەنگ و ھاتنەکێ!
ئێدی خەمێن خەریبییا من..
دگەل بەلگێن پاییزا من ناوەریێن
نە من زمان مایە، پەیڤا ب دووریا تە بێژم
نە من خولک و رەنگ و شیان مانە
گاڤا بەر ب تەڤە بھاڤێژم
سەنگینی و دژواریا کەڤالێن خەریبییا تە
ھەر شەڤ من ئازار و ئەشکەنجە ددەن
کەنگی دێ خەریبی دیاسایێ دا بیتە تاوان؟
دا ئەز چەند سکالایا لسەر تە تۆمار بکەم
ئەز دبێ دەنگیا رەنگێ واند خەندقیم
وەرە ب ھەمێزەک و ویسالەکێ ببە رزگارکەرەک
من ژناڤ پێلێن بەرزەبوونێ دا بینەدەر
یان ژی بھێلە ببمە خۆش پاری بۆ پێلێن خەریبییا
بلا دناڤ جەستەیێ خۆدا من ڤەشێرن و
ب بمە قوربانی خەریبییێن دەریا عەشقا تە
ھەی زالما بێ وژدان ما تو یا بێ دلی ؟!