کەڤالەکێ فەنتازیایی
قەهرەمان عەبدوللا حەمید بەرواری
تو یا ژ داڤێن رۆژێ دباری،
وەکو هویرکێ زیری
هەمی بۆشایێن بای دبرسقینی
تو یا دبییە ئاوازا بابەلیسکان،
ژ ناخێ خۆ یێ ئاڤز دایی
تو یا ژ کەڤالێ (مونالیزا)یێ دوەرێی
وەکو سادەییا گیانێ ئاوازەکا چیایی
تو یا ژ پرتێن ئەسمانی دکەڤی
وەکو چپکێن خۆناڤا سەر رویکێن گولێن زەندبادایی
تو یا دهێی و دهێی
تو کەڤالەکی،
پەرژانێ مژویلانکێن چاڤێن من
ب رۆندکان تە رەنگ دایی
من هزرەت بوو
هێدی هێدی
ژ چاڤێن تە عەشقێ فڕ بکەم
ژ نشکەکێڤە،
بارۆڤەیەک هات هەمی ئاگر،
بوو هەناسا شاریایی
ژ لێڤێن تە ڤەپەشی
تەقەزا بوو دل و هناڤێن من
ژ تلێن تە کانیک زان
عەشق و ڤیان
ژین و ژیان
پڕی دل و چاڤان کرن
من هزرەت بوو
هێدی هێدی
ژ دەستێن تە گولا بهێن بکەم
لێ،
ژ رویکێن تە تۆفان رابوون
گولاڤ باری
جیهان هەمی بوو گڕنژین
و کەیف ب ئێکجاری.
