کەیوان ئازاد: بێھنا کودەتایەکێ ژ رەوشا عیراقێ دھێت
ئەڤرۆ نيوز:
نێزیکی دو حەفتیایە ل پارێزگەھێن ژێری و ناڤەراستا عیراقێ نەرازیبوون و خوەنیسادانێن وەلاتیان د بەردەوامن، مامۆستایی زانکویان و چاڤدرێرێ سیاسی دبێژن حوکمەتا عیراقێ ب تەمامی شکەستن خواریە، وھەتا دھێت رەوشا عیراقێ بەر ب خرابیێ دچیت.
ھاریکارێ پرۆفیسۆر د. کەیوان ئازاد و شرۆڤەکارێ سیاسی بۆ رۆژناما ئەڤرۆ راگەھاند، عیراق ئەو وەلاتێ کێمترین سەقامگیری و ئارامی بخوە دیتی بەردەوام د ململانێ و کێشێن ناڤخوەیی و دەرەکی دایە، ل سالا 2003 و پتشی ژناڤبرنا رژێما سەدام حسێن ل جھێ عیراق بەر ب دیموکراتیێ بچیت، بەرۆڤاژی ئەو وەلات بەر ب ململانەیا مەزھەبی و و تائیفەگەری یا شیعی و سوونی چوو، چونکو وەلاتێن دەوروبەر دەست د کاروبارێن ناڤخوەیا عیراقێ دا ھەبوون.
د. کەیوان ئازاد ھەروەسا گۆت: دەمێ دەستھەلاتدارێن عیراقێ نەشێن ئاڤ و کارەبێ و پاقژکرنا باژێران و خزمەتگۆزاریێن گشتی و ئێمناھیا وەلاتی بۆ خەلکێ دابین بکەت، ئێدی وەلاتی دێ چەوا وێ دەستھەلاتێ ژوانا قەبوول کەت، لەورا ب باوەریا من رەوشا نوکە یا عیراقێ بەرب خراپتر دچیت، ژئالیەکێ دیتر ڤە ململانێ یا ئەمریکا و ئیرانێ پتر کارتێکرنێ ل سەر رەوشا عیراقێ دکەت، کو ھەر ئێک ژوانا بەرژوەندیێن خوە دڤێت و کونترۆلا عیراقێ بۆ ئالیێ خوە رادکێشیت.
مامۆستایێ زانکۆیا سلێمانیێ گۆت: دیرۆکا حوکمڕانیا عیراقێ یا پڕە ژ کودەتایێن لەشکری، لەورا ئەز ب دوور نابینم ئەڤ رەوشەیا نەسەقامگیر یا عیراق بخوڤە گرتی، کو جارەکا دیتر ھێزەک ھەیە ھزرا کودەتایەکێ ل سەر حوکمەتا عیراقێ یا نووکە بکەت، رەوشا ب ترسە، ب دیتنا من ژی ھەکە وەلاتێن ھەرێمی و رۆژئاڤایی ھاریکاریا وان کەسان بکەن یێن دڤێت ھزرا کودەتایێ دکەن، ئەو کودەتا دێ سەرکەڤیت و دێ شێن عیراقێ کونترۆل کەن، و ھەموو ھێزێن وەلاتێن دیتر ژ عیراقێ ب دەربێخن.
ھاریکارێ پرۆفیسۆر د. کەیوان ئازاد دووپاتکر، بێ گۆمان عیراق د دونیایا جیھانگیری و پێشکەفتی و دیموکراتی نەگەھشتیە، ئەو ھەلبژارتنێن ل وەلاتێ عیراقێ ھەر چوار سالان جارەکێ دھێنە کرن، دبیت سەروسیمایێ مرۆڤان دھێنە گوھۆڕین، بەلێ نەشیایە عەقلیەتا عیراقیان بگوھۆریت ب عەقلیەتکا حوکمڕانیا سەردەم، مە دیت دەمێ کوردان ب ریفراندۆما سەربخوەیا کوردستانێ بکارئینان، ئەو عەقلیەت ھەبوو کو ھەردەم ھزرا بکارئینانا ھێزا لەشکری بۆ ئێکلاکرنا کێشێن ل گەل کوردان کریە، ب مخابنی ڤە بھاریکاریا دەستێن ناڤخوەیی شیان ھێزا لەشکری بینە سەر مە.
