گۆتن
ئامادەكرن: باڤێ نازێ
داخویانی:
من ژ هەر باخچەكێ گولەك ژ خوە رە دزی.
وە ژی ماف هەیە, ژ شوونا گولەكێ, چەند گولان ژ بۆ خوە ببن.
باڤێ نازێ.
ژ گۆتنێن رێیا دەربرینێ
– ئاگر, ب چاڤان دكەت. (ب هەموو هێزا خوە دچوو خوەستەكا خوە).
– ئاگر, د ناڤا من دە یە. (دلێ من ل سەر وە دئێشە).
– ئاگر, د ناڤا وی دە یە. (دلێ وی دئێشە).
– ئاگر ژێ دبارە. (پر ب هەلچوونە).
– ئاگر, ژ بۆ زڤستانێ گولە, لێ ژ بۆ هاڤینێ, مرنە. (ل گۆرا دەمێ, مفا ژ تشتان).
– ئاگر, ژ دەڤ دبارە. (پر زڤێر بوویە).
– ئاگر, ژ دەڤێ وی دباریا. (ب توند دچە سەر یەكی).
– ئالگوشكێن وی شكەستینە. (كێم ئاخاڤتنە, یان ژی كێم خوارنە).
– ئالف ژ بۆ دەوارا یە. (مالا خوە نەكە ئالف).
– ئاقلێ وی, ژ كیسێ خەلكێ یە. (ئەو نە ب هشێ خوە یە).
– ئاقلێ خوە ژ سەرێ خوە ناڤێژە. (خوە وندا نەكە).
– ئاقل, ژ خوە رە گرتیە. (نەما وەكو بەرێ, ب هێزر ژیانا خوە دكە).
– ئاسیمان بكەلین. (تشتەكی مەكە. تەمبەلیا خوە بكە).
– ئاسیمان چاوا بێسایبوونێ نابە, وەها ژی بێ ئەوران. (هەر یەك ب خسلەتێن خوە).
– ئاسیمانێ وە نە سایی یە. (ل پشت كەوالیسا تشتەك هەیە).
– ئاشێ نەزانا ب خوە دگەرە. (مرۆڤێ نەزان, نە ب ڤیانا خوە, كارێ خوە دكە).
– ئاڤا ب گیان. (خوەدی هێز و هنەر).
– ئاڤێ گراڤ دكە. (ب مەبەست دچە خاپاندنێ).
– ئاڤێ گراڤ مەكە. (راستیێ نەنخومینە. یاریێ ب قەدەرێ نەكە. یان ژی ئاڤێ شلۆ نەكە).
– ئاڤێ نەكە پەلوول. (راستیێ ڤەنەشێرە).
– ئاخاڤتنا وی ب قلۆچ و پۆش بوو. (ئاخاڤتنا رەق و دەستهلاتداری بوو).
– بابیسۆك لێ رابوویە. (نەما مایە ب دەستێ خوە, یان ژی مال لێ خەرا بوویە).
– باهۆز لێ رابوویە. (كەتیە بەر خەزەبێ).
– با لێ رابوویە.
– باران نابە تۆز. (شەڤ نابە رۆژ. هەر دیاردەیەك د سروشتی دە وەك خوە دمینە).
– بارێ ئاسیمانی گران بوویە. (ئەور گرتیە سەر).
– بارێ ل سەر ملێ تە, نەڤێژە سەر ملێ كەسەكی دن. (ب خوە كارێ خوە بكە و تەمبەلیێ نەكە).
– بارێ خوە دانی. (ب دلێما خوە رابوو. كارێ خوە برە سەری).
– باسكێن وی كەتنە بەر. (نەما یێ فرەیە. یان ژی بێ باوەری بوویە).
– بەنیشت, د دەڤێ خوە دە, پووچ مەكە. (گۆتنا خوە بێواتە نەكە).
– بەر ب نەوالێ ڤە دچە. (رۆژ ب رۆژ ژ مەقامێ خوە دادكەڤە).
– بەرێ دارێ, خەملا وێ یە. (مرۆڤێ خوەدی بەرهەم, هێژایی خوە یە).
– بەس بچرین. (بەس دەرەوا بكە).
– بەتا-وەتا بوو. (بێ شۆپ وندا بوو. ب تەمامی, ژ بەر چاڤان چوو).
– بێ جی و وار بوویە. (تشتەكی وی د ناڤ تشتان دە نەمایە).
– بێ هەڤێرترش هەڤیر نابە هەڤیر. (بێ بزر شینكایی شین نابە).
– بێهنا خوە بەردە. (چاوا خەبات ژ بۆ ژیانێ, وەها ژی بێهنڤەدان).
– بێهنفرەهی, هەسانیا گیانە. (بێهەلچوونی رەهەتیا جانە).
– بێهن لێ چكاندن. (پر تەنگاڤ كرن).
– بێ لڤینە. (مینا كو ئەو مریە).
– بێریكا خوە زوو داگرت. (د دەمەكە كورت دە, بوو خوەدی مال).
– بێریك تژە یە. (پر دەولمەندە).
– بێ شیرێ دایكێ مایە. (لەواز بوویە).
– بێڤلا خوە دخە هەر دەڤەرێ. (ب گۆتنێن ڤالا خوە دخە ناڤ گۆتنێ).
– ب ئالاستنێ, زك تێر نابە. (ل گۆرا تشتان, كرن. یان ژی, ئەو تشتێ تێتە خوەستن بكە).
– ببێژە, لێ نەپێژە. (ئاخاڤتنا خوە ب توندی نەكە).
– ب بلاندایی بفرە. (خوە نزم مەكە).
– ب دەردەكی, دەردەك وندا دبە. (ئێش, ب ئێشێ دەرمان دبە).
– ب دەرەوا نان نایێ خوارن. (بێ كەد ژیان نابە).
– ب دەست و لنگێن خوە هاتیە گرێدان. (ئازادیا خوە ب هەر ئاوایی وندا كریە).
– ب دوژمن رە, زارێ خوەش, لێ ب پشتهشكی. (ب دوژمن رە, ئاخاڤتنا ب یاری و بێیی ژ یا خوە داكەتن).
– بجوو-بجوو و بخە دەڤ. (مقایەتیێ ل زارۆكی بكە).
– ب چاڤەكیل تشتان دنێرە. (مرۆڤەكی یەكالی یە).
– ب چاڤێن خستنێ ل بەر خوە دنێرە و دئاخڤە. (ئەڤ ژی نیشانا ترس و دەرەوێ یە).
– ب چ ئاڤێت تە, ب وێ ژی لێ ڤەگەرینە. (یەك ب یەكێ و خوە ژێ نەهێلە).
– ب چوار چاڤان دنێرە. (تشتەكی ژ بەر چاڤان بەرنادە).
– ب گوهەكی گوهداریێ دكە. (كەسی نابهیسە).
– ب گوهێ وی بگرە. (بلا راستیێ ببێژە. یان ژی دانپێدانێ ب تشتێ كو كریە بكە).
– بهارێ – پەز,
هاڤینێ – رەز,
زڤستانی – ئەز. (كرن, ل گۆرا دەمێ).
– ب هێسرێن خوە چكوسە. (كێم دگری, یان ژی بێگری یە).
– ب كەن دپەقە. (كەنێ ب هیق-هیق و هێسر).
– بكەڤە یارێ خوە. (وەك خوە بمینە).
– ب كێری خوە نایێ. (هەتا نكارە خوە خوەدی بكە).
– ب كراس ژ دایكێ بوویە. (بەختیارە).
– ب كو دە دچە, شۆپا خوە پاقژ دكە. (ئەو تشتێ كو ژ بۆ خوە دكە, ڤەدشێرە, ژ كەسی رە نابێژە).
– ب كو دە دچە, نكارە بچە. (ل هەر دەڤەرێ دەرگەه ل بەر تێنە گرتن. یان ژی, هەر دەم ئاستەنگی دكەڤن بەر كارێ وی).
– بلا بێهنا تە نەكە. (وی نێزی خوە نەكە).
– بلا دلێ مرۆڤی نەشەوتە. (بلا ئەو ل سەر لنگێن خوە بە و هەر دەم د لڤینێ دە بە).
– بلا پێشین ل خوە ڤەگەرە. (بلا هشێ وی بێ سەرێ وی).
– بلا زارۆكێن تە, د بن باسكێن تە دە بن. (ب خوە ب پەروەردە و خوەدیكرنا زارۆكێن خوە رابە).
– ب لەپكێ مریشكێ هاتیە نڤیساندن. (نڤیسا كو نایێ خوەندن).
– ب لەز چوونا پرسێ. (ئەگەرێ نەتێگەهشتنێ یە).
– ب لەزێ مرۆڤ, ب دەرەنگی دكەڤە. (چووین, گەرەك ب دەمێ بە, نە كو ب لەزێ بە).
– ب مقەریسی ژ یا خوە داناكەڤە. (ب سەر هشكی, ل سەر نەرینا خوە دمینە).
– ب پرسێ تو یێ بچی خورسێ. (ب وەرگرتنا زانینێ هەموو رێ ل بەر تە ڤەدبن).
– ب قەب-قەبە. (ژ خوە ئەولەیە. هەر تم دەنگ دبە خوە).
– ب قلۆچێ قایی بگرە, نە ب تەریا وی. (كرنێن درووست بكە).
– ب قوجێ گایی بگرە, نە كو ب تەریا وی. (كرنێن دروست و یێن د جیێ خوە دە بكە, نە كو یێن شاش).
– برا, ژ هەڤ جهێ دبن, لێ هەڤال نا. (دۆستانی, هەتا ژ برایەتیێ شێرینترە).
– براتیا راست, كولیلكا ژیانێ یە. (دۆستانی و هەڤالتیا ژ دل خەملا هەبوونا مرۆڤی یە).
– ب رۆژ بلبلە, ب شەڤ بشكولە. (ل بەر چاڤان تشتەكە, لێ پشت چاڤان تشتەكی دنە).
– برچیبوون, نە برایێ هەر كەسی یە. (نە هەر كەس هەژارە).
– برووسك ژێ دچن. (پر گەرمە).
– ب سەر نەوالێ ڤە هات. (رێیا نە خێرێ كەتە بەر).
– ب توركێ ڤالا كەس دوور ناچە. (دەستڤالا یەك نكارە خوە بگەهینە جیێ دخوازە).
– ب خوە بكاربە. (خوە فلتی مەكە. خوە ژ دەستێ خوە بەرنەدە).
– ب خوەدێ, مێشێ ژی نائێشینە. (پر دلپاكە).
– ب خوەدێ, وی باروود بێهن نەكریە. (ئەو نەكەتیە ناڤ شەر. یان ژی دژواری د ژیانا خوە دە نەدیرتیە).
– ب خوە كەتیە خەفكا خوە. (فناسێن وی ل سەرێ وی پەقیان).
– ب خوەیدانێ, نە ب باویشكێ. (ب كەدێ بژی, نە ب روونشتنێ).
– ب یا سەرێ خوە بكە. (ب ئاقلی كارێ خوە بكە).
– بزنا كولەك, شڤانێ بەزەك, ئێڤاری ل گوهەرێ ب هەڤ رە نە. (خەلك, هەر چەندێ ژ هەڤ دور بن, لێ هەر ئەوێ بگەهێن هەڤ. یان ژی, هەگەر ئەم یێن هەڤن, دوربوونا ژ هەڤ, ژ بۆ چ یە?).
– بیستكەكێ ژی وندا ناكە. (تشتەكێ ژ بەر دەستێ خوە بەرنادە).
– بۆیاخێ تیر بكە. (نە وەكو هەیە, خویا بكە).
– برۆڤێن خوە مەخە گۆڤەندێ. (تشتێن كو نابە – نەكە).
