گاره و سێمێل د گرنترین یاریێن ئه‌ڤرۆ دا
ئه‌ڤرۆ،
دهێته چاڤه‌ڕێكرن ئه‌ڤرۆ یاریێن گه‌ڕا سێیێ ژ هه‌ڤڕكیێن خولا كوردستانێ بۆ یانێن پلا ئێك بهێنه ئه‌نجامدان، د كۆما ئێكێ دا یانا گاره دێ مێڤانداریا یانا سێمێلێ كه‌ت، ئالتۆن كوپری دێ بیته مێڤانا ئاكرێ، ژلایێ خوه‌ڤه به‌رده‌ره‌ش د ڤێ گه‌ڕێ دا یا چاڤه‌ڕێ كری بیت.
لدور به‌رهه‌ڤیێن هه‌رسێ یانێن پارێزگه‌هێ بۆ یاریێن خوه سه‌رپه‌رشت و راهێنه‌رێن وان بڤی ره‌نگی بۆ رۆژناما ئه‌ڤرۆ دیاركرن.
په‌روه‌ر حسێن سه‌رپه‌رشتێ تیما سێمێل گۆت: به‌رهه‌ڤیێن مه د ئاسته‌كێ باش دانه و ژ هه‌ر لایه‌كی ڤه تیم یا به‌رهه‌ڤه و چو كێماتی نینن، دبیت ده‌ستپێكا خولێ ئاسته‌نگ هه‌بووینه لێ پشته‌ڤانیا مه‌عنه‌وی و دارایی ژلایێ كارگێریێ ڤه ئێك ژ پالده‌رێن سه‌ره‌كی نه كو تیما مه به‌رهه‌ڤبیت، یاری ب سانه‌هی نینه و ئێك ژ كلاسیكویێن پارێزگه‌هێ یه، ب هیڤییا وێ یه‌كێ یاریه‌كا ب ئاست بلند و هونه‌ری بهێته نیشاندان.
ژلایێ خوه‌ڤه وه‌لات عه‌بدولخالق هاریكارێ راهێنه‌رێ گاره گۆت: بۆ هه‌ر یاریه‌كێ مه ئێك ئارمانج هه‌یه ئه‌وژی سه‌ركه‌فتن، هه‌رچه‌نده ئه‌ركێ مه بۆ خولا پلا ئێك یا بزه‌حمه‌ته لێ ئه‌م كادرێن راهێنانێ ل گه‌ل یاریزانا رژدین بۆ هه‌ڤڕكیان و پلێتا ده‌ربازبوونا پلا نایاب، یاریا ل گه‌ل سێمێلێ وه‌كو هه‌ر یاریه‌كا دی یا گرنگه و بهێزه، هه‌ردو تیمێن پارێزگه‌هێ نه ب هیڤی نه یاریه‌كا خووش بیت و یا جوان بهێته كرن.
