گاڤەك بۆ سەقامگیری و سەرفەرازیێ
غیاس خـالد زێباری
سەرەدەریێن ڤان سالێن داویێ یێن دەولەتا ئیراقێ و روودانێن سەردەمێ شەڕێن د ناڤبەرا ئەمریكا و ئسرائیلێ دا ل گەل ئیرانێ، دیاركر كو هەبوونا قەوارێ هەرێما كوردستانێ و دەستكەفتێن نشتیمانی و نەتەوەیی یێن گەلێ كورد، بۆ هێزێن شۆفینیێن ئیراقێ و كۆمارا ئیسلامیا ئیرانێ ئاسەنگەكا مەزنە و رێگرە ل هەنبەر كەهیبوونا سیاسەت و ستراتیژیەتا دارشتیا وان ل ئیراقێ و دڤەرێ. ئەڤ سەرەدەریێن دەولەتا ئیراقێ ل دژی ئارامی و سەقامگیری و پێشڤەچوونێن هەرێما كوردستانێ ، ل گەماروویێن ئابووری و دارایی و هەولێن بەردەوامێن لاوازكرنا پێگەهێ كوردان ل بەغدا و گوهنەدانێن چەندین ماددەیێن دەستووری یێن گرێدایی ب كوردستانێ ژ وان ماددێ ١٤٠ هەتا دگەهیتە هێرشێن لەشكری، بەلگەهێن ئاشكرانە كو ئیراقێ نە باوەری ب مافێن رەوا یێن خەلكێ كوردستانێ هەیە، نە ژی ئیراقەكا دیموكراسی و فیدرالی، بەلكی تنێ باوەری ب هێزا زۆرینە و خوە سەپاندنێ یە و مەزنترین ئارمانجا وان لاوازكرن و نەهێلانا قەوارێ هەرێما كوردستانێ یە، لەوما سەرەرای بێ لایەنیا هەرێما كوردستانێ ل شەرێ ئەمریكا و ئسرائیل ل گەل ئیرانێ، ب هێرشێن دروونی و مۆشەكی بەرسڤا ڤی هەلوەستێ مرۆڤایەتی و بێ لایەنیا كوردستانێ هاتە دان. فەرە ئەڤ هەلوەست و گاڤێن تێكدانا ئارامی و سەقامگیریا كوردستانێ ببنە پەند و وانە بۆ هێزێن سیاسیێ كوردستانێ كو ب هەست بەپرسیاریەتیا نشتیمانی و نەتەوەیی بكەن و ب زۆترین دەم پەرلەمانێ كوردستانێ كاڕا بكەن و كابینا دەهێ یا حوكمەتێ پێك بینن و ل بەغدا ژی ب هەمان هەست و گیان ئێكرێزیێ دروست بكەن و وازێ ب بەرژەوەندیێن بەرتەسكێن حزبایەتی بئینن. ئەڤ چەندە تاكە گرەنتیا ئارامی و سەقامگیری و مانەڤا قەوارێ هەرێما كوردستانێ یە و دەربازبوونا ڤێ رەوشا سەپاندییە ب سەرفیرازی. خەلكێ كوردستانێ پێدڤی ب ئارامی و سەقامگیریا سیاسی هەیە نەك بەردەوامیا ڤێ دووبەرەكیا دوژمنكارانە ئەوا گەهشتیە وی ئاستی شانازیێ ب پەكئێخستنا پەرلەمانێ كوردستانێ و رێگری ل پێكئینانا حوكمەتا هەرێمێ بكەن، یا ژڤێ حیبەتیتر ئەوە هندەك كەنالێن ڕاگەهاندنێ و سۆشیال میدیایێ، ب لێدانا هەولێرا پایتەخت و شەهیدبوونا پێشمەرگەهـ و وەلاتیان ب هێرشێن ئیرانێ و گرۆپێن ئیراقێ یێن سەر ب وان دلخۆش دبوون! چونكی ل دەڤەرا دەرڤەی دەستهەلاتا فلان حزبێ یە، ب بەردەوامیا ڤێ كەرب و كینێ نە سەقامگیریا ئاسایشێ بەردەوام دبیت، نە سەقامگیریا سیاسی دروست دبیت. بەلكی مەترسیێن ل سەر هەرێما كوردستانێ دێ زێدەتر بن و ل بەغدا ژی پێگەهێ كوردستانێ دێ لاوازتربیت و دەرفەت ژی بۆ شۆفینیێن بەغدا خۆشتر بیت بۆ سەپاندنا بریار و قانوونێن ل دژی هەرێما كوردستانێ و بەرژەوەندیێن خەلكێ كوردستانێ.
