گرانبوونا بهایێ كه‌لوپه‌لان د بازاڕێن جیهانێ دا كاریگه‌ری یا ل سه‌ر هه‌رێمێ كری
هه‌ولێر، قائید میرۆ:
پشتی ده‌ستپێكرنا شه‌ڕی زۆربه‌یا كارگه‌هێن ئۆكرانیا هاتینه راگرتن و سه‌رۆكێ ئێكه‌تیا هاورده و هه‌نارده‌كارێن هه‌رێما كوردستانێ ژی دبێژیت: شه‌ڕێ رووسیا و ئۆكرانیا كاریگه‌ری ل سه‌ر ئابورێ هه‌رێما كوردستانێ نابیت.
مسته‌فا عه‌بدولڕه‌حمان، سه‌رۆكێ ئێكه‌تیا هاورده و هه‌نارده‌كاران بۆ رۆژناما ئه‌ڤرۆ دیار كر، شه‌ڕێ د ناڤبه‌را رووسیا و ئۆكرانیا دا كاریگه‌ری ل سه‌ر ره‌وشا ئابووری یا هه‌رێما كوردستانێ نابیت، ژ به‌ركو رێژه‌یه‌كا كێم یا كه‌لوپه‌لان ژ ئۆكرانیا بۆ هه‌رێما كوردستانێ دهێنه ئینان و گۆت: “قه‌بارێ بارزگانیا د ناڤبه‌را رووسیا و ئۆكرانیا دا بۆ هه‌رێما كوردستانێ گه‌له‌ك نینه و سالانه دگه‌هیته نێزیكی 20 ملیۆن دۆلاران، مخابن د ده‌مێ نوكه دا زۆربه‌یا كارگه‌هێن وه‌لاتێ ئۆكرانیا ژ ئه‌گه‌رێ په‌یدابوونا شه‌ڕی هاتینه راگرتن، له‌وڕا ژی نوكه ئه‌م ل رێكا پێگوهۆڕ دگه‌ڕین بۆ ئینانا كه‌لوپه‌لێن ژ ئۆكرانیا دهاتنه هه‌رێما كوردستانێ”.
ل دۆر بلندبوونا بهایێ كه‌لوپه‌لان مسته‌فا عه‌بدولڕه‌حمان گوت: “بلندبوونا بهای گرێدایی شه‌ڕێ د ناڤبه‌را رووسیا و ئۆكرانیا نینه، به‌روڤاژی ل بازاڕێن جیهانێ بشێوه‌یه‌كێ گشتی بهایێ هه‌موو تشته‌كی بلندبوویه و ئه‌ڤێ چه‌ندێ ژی كاریگه‌ری كریه سه‌ر ره‌وشا بازاڕێن هه‌رێما كوردستانێ، ئانكو ل ژێده‌رێ به‌رهه‌مئینانێ بهایێ كه‌لوپه‌لان بلندبوویه و راسته‌وخوه ل بازاڕێن كوردستانێ ژی بها بلندبوویه”.
