گرانبوونا بهایێ كه‌لوپه‌لان سستی ئێخستیه بازاڕی
ئه‌ڤرۆ، زنار تۆڤی:
د ئه‌ڤ ساله دا ژ ئه‌گه‌رێ گرانبوونا بهایێ كه‌لوپه‌لان ل بازارێن هه‌رێما كوردستانێ ره‌وشا بازاری نه‌سه‌قامگیریه‌ك ب خوه‌ڤه دیتیه، فرۆشیار كێمتر ژ جاران تشتێن خوه دفرۆشن، بكڕ ژی ژ ڤێ ره‌وشێ د دلگرانن و گازنده‌یان دكه‌ن و دخوازن كه‌لوپه‌ل هند گران نه‌بن، هه‌روه‌سا د نوكه دا ل سه‌رانسه‌ری جیهانێ بهایێ كه‌لوپه‌لان گران بوویه و بازرگان ژی ب گرانی كه‌لوپه‌لان ژ ده‌رڤه دئینن.
وه‌لاتیه‌ك ب ناڤێ ئه‌سعه‌د حه‌مدی، بۆ رۆژناما ئه‌ڤرۆ دبێژیت: ژ نه‌چاری مه پێدڤیێن رۆژانه كێمكرینه، ئه‌م وه‌كو جاران تشتان ناكڕین و ب تنێ رۆژانه وان تشتان بۆ مال دئینین، یێن كو مه گه‌له‌ك پێدڤیاتی پێ هه‌یی، چونكی بهایێ هه‌موو تشتان گران بوویه، دیسا پشتی داكه‌فتنا بهایێ دیناری ژی زیان گه‌هشتیه مه، هه‌روه‌سا پڕانیا كه‌لوپه‌لێن خه‌لكێ مه پێدڤی پێ هه‌یی ژ ده‌رڤه‌ی كوردستانێ دهێن، له‌وما بهایێ وان گران بوویه، رۆژ بۆ رۆژێ تشت گرانتر لێ دهێن، بازاری ژی سستی و خاڤبوونه‌كا به‌رچاڤ ب خوه‌ڤه دیتیه، هه‌ر تشته‌كێ ل بازاری هزار دینار هنده‌كان ژی دو هه‌تا سێ هزار دیناران و هه‌نده‌ك تشتان پتر ژی چووینه سه‌ر.
ئازاد عه‌بدولكه‌ریم، خودانێ ماركێته‌كێ یه دبێژیت: پڕانیا تشتان یێن گران بووین و خه‌لك ژی وه‌كو به‌ری نوكه تشتان ناكرن و بازار یێ سست بوویی، ڤێ چه‌ندێ كارتێكرنه‌كا خراب ل سه‌ر كارێ مه و بازاری ب ره‌نگه‌كێ به‌رچاڤ كریه، هه‌روه‌سا ژ به‌ر هه‌بوونا كۆرۆنایێ و داكه‌فتنا بهایێ دینارێ عیراقی ل هه‌مبه‌ری دۆلاری ژی بازار سست بوویه، هه‌كه ب ڤی ره‌نگێ نوكه بیت، دێ ره‌وش به‌ر ب خرابترڤه چیت و دبیت كه‌لوپه‌ل ژی گرانتر لێ بهێن.
ئازادی گۆت: “هه‌ر ده‌مێ كه‌لوپه‌ل گرانتر لێ بهێن، بازارێ مه ژی گه‌له‌ك سستتر لێ دهێت، له‌وما ئه‌م دخوازین كه‌لوپه‌ل ئه‌رزان ببن، داكو وه‌كو به‌ری نوكه بازار ژی خۆشتر لێ بهێت، لێ هه‌كه وه‌كو نوكه بازار یێ گران بیت، دێ هه‌ر بازار ب ڤی ره‌نگی یێ سست و خاڤ بیت”.
