گرنگترین ئەتەكێت بۆ جەماوەرێ وەرزشی د ناڤ ستادیۆمێ دا
دیتنا یاریێن وەرزشی و پشتەڤانیێ د ناڤ یاریگەهێن تەپا پێی دا خۆشیەكا تایبەت یا جەماوەری یە كو ل سەر ئاستێ جیهانێ هەمیێ ل ستایۆمێ دهێتە دیتن و ب رەوش د ئێخیت، لێ هندەك جاران جەماوەر د كەڤیتە د خەلەتیان دا تایبەت دەمێ پشتەڤانییا یانەیا خوە بكەن و گەلەك جاران ژ گیانێ وەرزشی دبیتە توندوتیژی و گۆتینێن كرێت.
ژبەر نێزكبوونا وەرزێ نوو یا خولا ستێرێن ئیراقێ یا تەپا پێی ئەوا بڕیارە ل پێنچ شەمبییا بهێت دەستپێبكەت و هەردو یانەیێن دهۆك و زاخۆ نوونەرێن بەهدینان، من دڤییا هندەك ئەتەكێتێن پشتەڤانیێ دناڤا ستادیۆمێ دا بۆ هەوەیێن هێژا دیار بكەم.
یا ئێكێ: ئەتەكێتا بەری بهێنە دناڤ یاریگەهێ دا:
یا درۆست ئەوە ل جهێ وەرگرتنا پلێتێن چوونا ژوور جەماوەر بەری یاریێ ب نیڤ دەمژمێرێ و زێدەتر بەرهەڤبیت ل دووڤ پلێتێ و جهێ بۆ هاتیە دەستنیشانكرن، دیاركرنا پلێتا خوە كو وەرگرێ پلێتێ ببینت ژبۆ ئاسانكارییا چوونا وی بۆ ناڤ یاریگەهێ دا، یا باش ئەوە چو خارن و ڤەخوارن و تشتێن قەدەغەكری نەئینن كو زەرەێ بگەهینە یاریێ تایبەت ئەوێن دبنە ئەگەر بۆ تێكدانا یاریێ دناڤ یاریگەهێ و ل سەر پەلۆكان، ژ ئەتەكێتان پاراستنا پاقژییا پەلۆكێن یاریگەهێ ژ ئەو خارن و ڤەخارنێن ڤەمایی، دیسان پاراستنا ئەوان پەلۆكا بكەن ئانكو كورسیان چنكو پشتەڤانی چ پەیوەندی ب خرابكرنا پەلوكان نینە، هەروەسان پاراستنا جهێن دەستشویێ ژی دڤێت بهێتە كرن.
دویێ: ئەتەكێتا د دەمێ سەحكرنا یاریێ دا
یا گرنگ ئەوە بهیچ رەنگەكی یاریێن ئاگری یێن قەدەغەكری نە ئینە دناڤ یاریگەهێ دا ئەوا ژلایێ كارگێریێ ڤە هاتییە دیاركرن و پێگری ب پشتەڤانیا گیانێ وەرزشی هەبیت و دوور ژ هەر توندوتیژەكێ یان گۆتنا سرۆد و دروشمێن رەكەزپەرسیێ ل سەر هەر یانەكێ یان یاریزانەكی، یا گرنگتر خوە دیركرن ژ گۆتنێن كرێت دژی دادڤانێ یاریێ ژبەر بڕیارەكێ كو جەماوەری ژێ رازی نەبیت، ل بەركرنا درێسێ یانەیێ ژلایێ جەماوەری پێنگاڤەكا جوان یا شارستانی یە، ل دووماهیێ ژی گیانێ وەرزشی هوسا بیت دەمێ یانەیا خودانێن ئەردی خوسارەت بیت جەماوەر خوە تۆرە نەكەت نە دگەل كارگێریێ و نە دگەل كادرێ راهێنانێ و یاریزانان یان ژی توندوتیژێ دگەل دادڤان و یانەیا مێڤان ژبەر كو رەوشتەكێ نە وەرزشی یە، یا گرنگ بۆ هە یانەكا مێڤان دڤێت روویێ جوان یێ یانەیێ و خەلكێ باژێرێ خوە نیشان هەمیان بدەین و ژ گرنگیان جەماوەر ژ د یاریێن دەستپێكی دا یێ بهێنفرەهـ بیت.
ل دووماهیێ داخوازا سەركەفتنێ بۆ هەر چار یانەیێن كوردستانێ دكەین ب هیڤییا ئەنجامێن سەركەفتی و پشكدارییەكا سەرفەراز دكەین.
