گرنگترین خالێن گرێبەستا ڕاهێنەرێن فوتبۆلێ لدووڤ ستاندەرێن جیهانی
سەرکەفت رشید
د فۆتبۆلا سەردەم دا، گرێبەست ب خۆ بووینە قارەمانیەکا راستەقینە، راهێنەر ئێدی نە بتنێ رێڤەبەرەکێ تەکنیکی یە کو مەشق و راهێنانان بدەت و پێکهاتەیی دەستنیشان بکەت، بەلکو یێ بوویە سەنتەرێ گرانیا وەبەرهێنانێ د ناڤ یانەیێ دا، و بهایێ یانەیێ ل بازاری، جێگیربوونا ژورا جل گۆهڕینا یاریزانان و پەیوەندی دگەل کارگێریێ، ئەڤە هەمی د ناڤ پیلانێن وی یێن یاسایی دا دهێنە دیارکرن بەری کو د ناڤ پیلانێن وی یێن تەکتیکی دا هەبن.
لڤێرە دێ هندەک ژ گرنگترین خالێن گرێبەستێن پیشەکاریێن جیهانی دەینە دیارکرن، یا ئێکێ فەلسەفەیە کۆ وەبەرهێنانا ب مەرجێ ئەنجامی و گرێبەستێن مەزن ئێدی بتنێ لسەر مووچەیەکێ جێگیر ناهێنە ئاڤاکرن، بەلکو سیستمەکێ تێکەل (Hybrid) پەیڕەو دکەن کو پێکدهێت ژ مووچەیەکێ بنەڕەتی یێ دیارکری، پاداشتێن بلندبووی (Bonuses) یێن گرێدای ب ئەنجامان و ناسناڤێن ناڤخۆیی و دەرڤە و کیشوەری، پاداشتێن تایبەت ب پێشخستنا یاریزانێن لاو و ب دەستڤەئینانا پلێتێن پشکداریێن دەرڤە وەکی یێن ئۆرۆپایێ، ئەڤ چەندە مەترسیا دارایی لسەر یانەیێ کێم دکەت و یا هەڤسەنگە دگەل یاسایێن جێگیربوونا دارایی (Financial Sustainability) یێن یوفا (UEFA).
یا دویێ ئەندازیاریا دابەشکرنا دەستهەلاتان کۆ دبیتە ئێک ژ خالێن بهێزێن دیارکرنا دەستهەڵاتێن راهێنەری و رێڤەبەرێ وەرزشی د گرێبەستێن پیشەکاران دا ئەوێن دهێتە چەسپاندن وەکی کا کێ مافێ دووماهیێ یێ کڕینا یاریزانان هەیە؟ هەروەسا دیارکرنا رۆلێ رێڤەبەرێ وەرزشی ب تەمامی.
ژلایەکێ دیڤە ل دووڤ ئەڤێ چەندێ یاسا دبێژیت: بێدەنگی د گرێبەستی دا، نیشانا دەستبەردانێ ژ دەستهەڵاتێ نینە. ژبەر هندێ، زۆربەیا کێشەیان ژ بەر یەکگرتنا دەستهەڵاتێن راهێنەر و کارگێریێ پەیدا دبن.
یا سێیێ یێ مەرجێن هەلوەشاندنێ یێن زیرەکانە ئانکۆ ژیر (Break Clauses) ئەڤ گرێبەستە بتنێ پشت ب سزایێ دارایی نابەستن، بەلکو سیستەمەکێ هەڤسەنگ پەیڕەو دکەن کو پاراستنا پرۆژەی دکەت، وەکی دیارکرنا قەرەبوویەکێ دیارکری ئەگەر یانەیێ گرێبەست هەلوەشاند، مافێ راهێنەری بۆ بجهێلانا یانەیێ د حالەتێن شکاندنا بەندێن سەرەکی دا و ژلایەکێ دیڤە بەندێ دووبارە دانوستاندنێ ئەگەر خودان یان سەرۆکێ یانەیێ هاتە گوهۆڕین بۆ نمونە راهێنەرێ نوکە یێ یانەیا بەرشەلونا فلێکی دیارکریە ئەگەر هاتو لاپورتا نە بیتە سەرۆکێ یانەیێ ئەو ل ئەوێ یانەیێ نا مینیت، ئەڤ خالە دبیتە ئەگەر کو بڕیارێن دوورخستنا راهێنەران نە بنە کێشە و بێسەروبەر نەبن و د حالەتێ کێشەیێ دا، دادگەها بڕیارێ (CAS) ل لۆزان دبیتە مەرجەع.
یا چارێ مافێن وێنەیی و نیشانا بازرگانی، راهێنەرێن مەزن ئێدی نیشانەکا بازرگانی نە (Brand)، لەورا گرێبەست رێکخستنێ بۆ ڤان خالان دکەن و چەوانیا بکارئینانا ناڤ و وێنێ راهێنەری د کەمپەینێن ریکلامێ دا. و ژلایەکێ دیڤە رێژەیا راهێنەری ژ داهاتێ ریکلامێن تایبەت دیار دکەت، ژلایێ پێگیریێن مێدیایی و ژمارەیا کۆنفرانسێن رۆژنامەڤانی.
یا پێنجێ جێگیربوونا وەرزشی وەک دەستوور بەندێن نوو یێن جیهانی پتر گرنگیێ ددەنە جێگیربوونا پرۆژەی، وەکی مانەڤەیا ستافێ هاریکار دگەل راهێنەری و ژلایەکێ دیڤە پێگیریا یانەیێ ب نە دەستێوەردانا تەکنیکی یا راستەوخۆ، هەروەسا
نووژەنکرنا گرێبەستی ب شێوەیەکێ ئۆتۆماتیکی ئەگەر گەهشتنە قارەمانیێن کیشوەری.
ل دووماهیێ فەرە بێژین گرێبەستێن سەردەم یێن راهێنەران ئامرازەکێ حوکمڕانیێ یە، سامانەکێ بیمەکرنێ یە بۆ داراییێ، و پارێزەرێ یانەیێ یە ژ بڕیارێن سۆزداری. و پیشەکاریا راستی ژ ژورا جل گۆهڕینێ دەستپێ ناکەت، بەلکو ژ ژورا دارشتنا یاسایی دەستپێدکەت. دەما دارشتنا یاسایی یا توند و تۆکمە بیت، ناسناڤ و قارەمانی دبنە ئەنجامەکێ سروشتی و نە ژ نیشکەکێ ڤە دهێن.
