گرنگیەكا باش ب كەرتێ چاندنێ دێ دەم
ئاكرێ، رەمەزان زەكەریا:
حاجی خەیرەدین گۆران، بەربژارێ ژمارە 18 ل سەر لیستا پارتی دیموكراتی كوردستان بۆ خولا شەشێ یا پەرلەمانێ كوردستانێ بازنەیێ دهۆكێ، بەرنامەیێ كارێ خۆ ئاشكرا كر و گۆت: ژبەر باشیا ئاخ و ئاڤ و هەوایێ كوردستانێ دێ گرنگیەكا باش ب كەرتێ چاندنێ دەم.
حاجی خەیرەدین گۆران، بەربژارێ ژمارە 18 ل سەر لیستا پارتی دیموكراتی كوردستان، د دیدارەكێ دا بۆ رۆژناما ئەڤرۆ گۆت: من دڤێت ئەڤ ژیێ مایی خزمەتا خەلكێ دەڤەرا خۆ بكەم، گەنجێن مە زیرەك و خودان شیانن، پێدڤی ب پشتەڤانیێ هەیە و رێ بۆ بهێتە ڤەكرن، دێ بزاڤێ كەم پرۆژەیێن بچوویك بۆ گەنج و لاوان بەردەست بكەم، گرنگە مرۆڤ كار ل سەر وی تشتی بكەت كو هەبیت، هەر چار وەرزێن كوردستانێ ب گشتی د گونجاینە بۆ كەرتێ چاندنێ و من دڤێت بكەمە كەرتەكێ بەرهەمهێنەر پتر جۆتیار ژێ مفاداربن.
ناڤهاتی ئاشكرا كر : دێ پشتەڤانیا ب ئەلیكترۆنیكرنا كارێ دام و دەزگەهێن حكومی كەم بۆ وێ چەندێ گەنج ببیتە خودان كار و وەلاتی ل مال بشێن مامەلەیێن خۆ برێڤە ببەن و ژیریا دەستكرد AI بۆ ڤێ چەندێ دەرفەتەكا باشە .
خویاكر: ئەم ب ئێكگرتی و ئێكرێزیێ خودان هەیبەتین ئێك ژ هەلوەستێن من یێن نەگۆر ئەوە هەموو پێكهاتەیەك بێ جۆداهی ب تنێ ل سەر بنەمایێ مرۆڤبوونێ ئەو كار و ئەركێ ب من بهێتە كرن تەخسیریێ ناكەم و كێمخەم نابم و دێ ب رەنگەكێ دلسۆزانە بجه ئینم، دێ بزاڤێ كەم ئاریشێن هەموو لایەكێ بێ جوداهی چارەسەر كەم.
