گرنگە گەنجێن مە ب رێكا مۆزیكێ كلتۆرێ خوە بپارێزن
دلڤین رەشید:
مۆزیكژەن (عەدنان كچان) د دیدارەكێ دا بۆ رۆژناما ئەڤرۆ دیاركركو ئەو خەلكێ گوندێ تل عزێرە سەر ب قەزا شنگارێ ڤە، نوكە ئاكنجی یە ل كەمپا شاریا و قوتابیێ قۆناغا ئێكێ یە ل پەیمانگەها هونەرێن جوان ل مووسل/ پشكا مۆزیكێ، ل سالا 2018 فێری ژەنینا مۆزیكێ بوویە و چەندین ئامیران د ژەنیت وەك فلۆت بلۆر و ئۆرگ.
ناڤهاتی گۆت: هەر ژ زارۆكینیا خوە من حەزا مۆزیكێ هەبوو، بەلێ پشتی هاتنا رێكخراوا تیرۆرستیا داعش بۆ سەر شنگارێ ئەم نەچار بووین ئاوارەی هەرێما كوردستانێ ببین و ل وی دەمی دا كریارێن وێ رێكخراوا توندرەو، نەبوونە رێگر ژبۆ ژناڤبرنا خەون و هیڤی یێن من د بۆارێ فێربونا موزیكێ دا، ئەو بوو ژلایێ رێكخراوا (بوهارا هیڤیا ڤە) دەلیڤە بۆ من پەیدا بوو كو ئەز بشێم بگەهمە وێ حەزا من هەی ل سەر دەستێ ماموستایەكێ هێژا ب ناڤێ (نادۆ سلۆ) ب شێوەیەكێ ئەكادیمی فێری چەندین جۆرێن ئامیرەیێن مۆزیكێ بووم و گەلەكا گرنگە گەنجێن مە ب رێكا مۆزیكێ كلتۆرێ خوە ب پارێزن، ب تایبەت ژی ستران و مۆزیكێن فۆلكلۆری یێن چیایێ شنگارێ.
