گرۆپێن چەکدار داخوازەکێ ژ ئاکنجیێن عەفرینێ دکەن
ئەڤرۆ
گرۆپێن چەکدار ل عەفرینێ داخواز ژ ئاکنجیێن وی باژێری ب تایبەتی ژی کوردان دکەن بێی بەرامبەر بۆ وان کار بکەن و توندوتیژیێ ل دژی خەلکی بکار بینن و ژ بەر هندێ ژی ئاکنجیێن عەفرینێ ب تایبەتی ژی کورد نەچار دبن ژ عەفرینێ بڕەڤن.
ناڤەندا چاڤدێریا مافێن مرۆڤی یا سووریێ راگەهاند، کو پشتی بیڤەلەرزا ڤێ دووماهیێ ل عەفرینێ و جندرێسێ گرۆپێن چەکدار دەست ب هندەک کارێن سەیر کرینە، گرۆپێن چەکدار داخواز ژ وەلاتیێن عەفرینێ ب تایبەتی ژی کوردان دکەن بێی بەرامبەر بۆ وان کار بکەن، لێ ئەو یەک ژ ئالیێ خەلکی ڤە دهێتە رەتکرن، ژ بەر هندێ ژی گرۆپێن چەکدار توندوتیژیێ ل دژی خەلکی بکار دئینن و خەلکێ ئاکنجیێ عەفرینێ ژی نەچار دمینن، کو بڕەڤن و بچنە دەڤەرەکێ دی، ژ بەر هندێ ژی دهێتە چاڤەرێکرن رێژەیا ئاکنجیێن عەفرینێ گەلەک کێمتر لێ بهێت ب تایبەتی ژی کورد، چونکی نها ژی رێژا کوردان ل عەفرینێ گەلەک کێم بوویە.
هەمان ناڤەندێ ئەو یەک ژی دیار کریە خەلکێ چەند تاخێن عەفرینێ ب تایبەتی ژی کوردان نەرازیبوونا خوە ل هەمبەر هەلوەستێ وان گرۆپێن چەکدار دیار کرینە و ژ بەر هندی ژی ئالۆزی د ناڤبەرا خەلکی و گرۆپێن چەکدار دا دروست بووینە، گرۆپێن چەکدار ژی هەتا نها ب دەهان وەلاتیێن کورد دەستەسەر کرینە و ئەو یەک ژی بوویە ئەگەرێ هندێ جارەکا دی کوردێن ل عەفرینێ هزرا هندێ بکەن، کو باژێرێ چۆل بکەن و بچنە دەڤەرەکا دی یا ئارام.
ئەو یەک د دەمەکێ دایە بەری نها چەندین جاران رێکخستنا مافێن مرۆڤی یا سەر ب نەتەوەیێن ئێکگرتی و گەلەک سازیێن دی داخواز ژ تورکیا کربوون گرۆپێن چەکدار ژ عەفرینێ ڤەکێشیت، چونکی گرۆپێن چەکدار رۆژانە مافێن مرۆڤی بنپێ دکەن، توندوتیژیێ ل دژی وەلاتیێن سڤیل بکار دئینن، خەلکی دەستەسەر دکەن و ب دەهان وەلاتیێن کورد ل عەفرینێ ژ ئالیێ گرۆپێن چەکدارێن سەر ب تورکیا ڤە هاتینە دەستەسەر کرن و هەتا نها ژی چارەنڤیسێ وان کەسان دیار نینە.
چاڤدێرێن سیاسی ژی دیار دکەن بیڤەلەرزا ڤێ دووماهیێ کاریگەریەکا گەلەک خراب ل ژیانا خەلکێ عەفرینێ و جندرێسێ کریە، گەلەک وەلاتێن جیهانێ بەرهەڤن هاریکاریا خەلکی بکەن، لێ ژ بەر هەبوونا گرۆپێن چەکدار هەتا نها وەکو پێدڤی هاریکاریا خەلکێ لێقەومی نەهاتیە کرن، هەروەسا ئەو هاریکاریێن گەهشتینە عەفرینێ ژی وەکو پێدڤی ل سەر خەلکی نەهاتیە دابەشکرن، چونکی رێژەکا مەزن ژ هاریکاریێن د دەستێ گرۆپێن چەکدار دانە و نادەنە خەلکی، ئەو یەک ژی بوویە جهێ دلگرانیا نەتەوەیێن ئێکگرتی و سازیێن دی یێن مافێن مرۆڤی، ژ بەر هندێ ژی هەتا گرۆپێن چەکدار ل عەفرینێ و دەڤەرێن دی ل باکورێ سووریێ بمینن رەوشا وان دەڤەران ئارام نابیت.
