گرۆپێن چەکدار ل عەفرینێ مالێن کوردان خراب دکەن
گرۆپێن چەکدارێن سەر ب تورکیا ل عەفرینێ و گوندێن دەوروبەرێن وێ مالێ وەلاتیێن کورد خراب دکەن و داخواز ژ وان دکەن ژ عەفرینێ بچن، وەلاتیێن کورد ژی نەرازیبوونا خوە ل هەمبەر کریارێن گرۆپێن چەکدار دیار دکەن و داخوازا دەرئێخستنا وان ل عەفرینێ دکەن.
عومەر شەمۆ وەلاتیێ کورد یێ عەفرینێ بۆ ئەڤرۆ دیار کر، چەند رۆژن گرۆپێن چەکدارێن سەر ب تورکیا گەفا ڤێ یەکێ ل وان دکەن کو دڤێت مالێن خوە چۆل بکەن و مە ژی بۆ وان گۆتیە ئەڤە جهێ باب و باپیرێن مە یە و ئەم مالێ خوە بۆ کەسی چۆل ناکەین و بەری دو شەڤان چەند گرۆپێن چەکدار هاتن و ئاگر بەردانە مالا مە و ئەم ژ ترسا نەچار مایین و چووینە گوندەکێ ل دەف کەسوکارێن خوە و گۆت: (گرۆپێن چەکدار یێن بووینە مەترسیەکا گەلەک مەزن ل سەر ژیانا وەلاتیێن عەفرینێ ب تایبەتی ژی یێن کورد و ڤێ دووماهیێ گەفان ل وەلاتیێن ئێزدی دکەن و دخوازن ئەو ل عەفرینێ نەمینن، ئەم داخواز ژ نەتەوەیێن ئێکگرتی و سازیێن مافێن مرۆڤی دکەین کو ل هەمبەر کریارێن ڤان گرۆپان بێدەنگ نەمینن، چونکی رۆژ ب رۆژێ مەترسیا گرۆپێن چەکدار ل سەر کوردان ل عەفرینێ زێدەتر دبیت و دڤێت سنۆرەک بۆ کریارێن وان بهێتە دانان).
وەلاتیەکێ دی یێ ب ناڤێ سەبری حەمۆ ژی بۆ ئەڤرۆ دیار کر، بەری دو رۆژان گرۆپێن چەکدار ئاگر بەرداینە مالا وی ل عەفرینێ و پاشی ژی گەف لێ کرینە و ژێ خواستینە د ناڤ ٢٤ دەمژمێران دا ژ عەفرینێ بچیت و ئەو ژ ترسا بەرێ خوە دایە گوندەکێ عەفرینێ و نها ل گەل برایێ خوە دژیت و گۆت: (مخابن دیمۆگرافیا باژێرێ عەفرینێ ب تەمامی هاتیە گوهۆڕین و گرۆپێن چەکدار هەر رۆژ ب زۆرێ کوردان نەچار دکەن کو مالێن خوە چۆل بکەن، ئەو یەک ژی مەترسیەکا گەلەک مەزنە ل سەر ژیانا ب هزاران کوردان ل عەفرینێ و دڤێت هێزێن کوردی ل هەمبەر رەوشا نها یا ل عەفرینێ بێدەنگ نەمینن و دەنگێ کوردان بگەهیننە وەلاتێن جیهانێ، چونکی هەتا گرۆپێن چەکدار ل عەفرینێ نەچن دێ مەترسی ل سەر ژیانا کوردان یا بەردەوام بیت).
