گرۆپەکی مۆزیکی یێ گەرۆک ل کوردستانێ ھاتە دامەزراندن
دلڤین رەشید:
ھونەرمەند و مۆزیکژەن سامان کەریم بۆ رۆژناما ئەڤرۆ دیار کر کو پشتی شەرێ تیرۆرستێن داعش وان د ھزر وێ چەندێ دا کر، گرۆپەکی مۆزیکێ یێ گەرۆک ل کوردستانێ دابمەزرینن و شیان نێزیکی 100 ئەندامان دڤی گروپی دا کوم بکەن ژ نەتەوە و پێکھاتێن جودا ژوانا ژی ل کوردستانێ و ئیراقی و ئورۆپا و گۆت: « د ڤی گرۆپی دا گرنگیێ ب مۆزیکا فلکلۆری ددەین و ئەڤ ھەموو پێکھاتە ب ئازادانە کەلتۆر و فلکلۆرێ خوە ب رێیا مۆزیکێ نیشان ددەن ئەڤ یەکە ژی دبیتە ئەگەر کو پەیوەندیێن ئاشتیانە دناڤبەرا واندا خۆرتر لێ بھێن».
ناڤھاتی دیارکر ژی ، مۆزیک زمانەکێ جیھانی یە و دناڤا ڤی زمانی دە ھەمی گەل و نەتەوە و پێکھاتێ جودا جودا ب زمانێ ھۆنەرێ موزیکی دژەنن، ئەڤ ھەموو پێکھاتە لسەرانسەری جیھانێ دشێن بگەھینە ئێک ئەڤە چەند سالەکن کو گرۆپەکێ موزیکی ب ناڤێ مشەخت ھاتیە دامەزراندن کو ل ھەموو دەران وەکو تیمەکا گەرۆک بگەرن دا کو پێکڤە ژیان و کەلتۆرەکێ ھەڤپشک ژێ پەیدا ببت .
ل دووماھیێ گۆت ھزرا چێکرنا گرۆپەکێ مۆزیکێ ب ڤی رەنگی بو کو ھەموو نەتەوە تێدا بن ، ئەڤ ھزرە ژی ژ ھندێ بۆ مە ھات کو کاودانێن ژیانێ وەلێ ھاتبوون ھندەک دوور کەتن دناڤبەرا ڤان نەتەوە و پێکھاتاندا پەیدا ببوو ڤیجا چ ژ ئەگەرێ شەران یان ژی ئابووری یان ژی جوگرافی بیت مە ژی ب دەلیڤە زانی ب رێیا گرۆپەکێ مۆزیکێ یێ گەرۆک ئەڤان ھونەرمەندان ل ئیراقێ و جیھانێ ل ھەڤ کۆم بکەن و پەیوەندی وان خورتر لێ بکەین، رەوشنبیریا ھونەرێ مۆزیکی ژی ل ھەڤ بگوهۆرین وەک ھونەرمەند».
