گشتپرسی پێنگاڤهكه بهرهڤ سهربهخۆیێ؟
گشتپرسی وهك ههرێما كوردستانێ راگههاندی بڕیاره ئهڤ ساله بهێته ئهنجامدان، وهك پێنگاڤا ئێكێ یه بهرهڤ دهولهتبوونێ، ژبهركو یا ئێكێ پرسكرنه ب گشت خهلكێ كوردستانێ و زانینا رایا وان ل سهر بابهتی، و یا دووی زانینا بوَچوون و كارڤهدانێن حوكمهتا عێراقێ و وهلاتێن دهوروبهر و جڤاكێ نیڤدهولهتی یه. ههموو بۆچوون ل دوور گشتپرسیێ دێ ئاشكهرا بن، ههكهر گشتپرسی بهێته ئهنجامدان دێ رژدیا ههرێمێ ل دوور پرسا دهولهتبوونێ دیاربیت، و دێ بیته بنیات بوَ پێنگاڤێن داهاتی یێن ههرێمێ دهاڤێژیت بۆ گههشتن و دامهزراندنا دهولهتا كوردی، و بزاڤێن نههێلانا ئاستهنگێن هێدی هێدی دیاردبن وهك چهوا فروَتنا پهترولێ بوَ ئهگهرێ برینا بوَدجێ و ل دووماهیێ بڕینا بوَدجێ ههرێما كوردستانێ نهبوو سهدهم كو حوكمهتا ههرێما كوردستانێ ژ سهربهخۆ فرۆتنا پهترۆلێ پاشگهز نهكر و بهردهوامی دا فرۆتنا پهتروَلێ.
گشتپرسی بلا یا راست بیت، راسته مهرج نینه پشتی گشتپرسیێ ئێكسهر دهولهت بهێته راگههاندن بهلێ دڤێـت پێنگاڤێن بهرهڤ دهولهتبوونێ نه راوهستن، ژبهركو گشتپرسی بتنێ بۆ ناڤ و بشێوێ نه پێگیر رامانا وێ ڤهشارتنا شكهستێن حوكمهتێ و كریارا سیاسی ههموویێ یه، رێكهكه بوَ سڤككرنا گڤاشتن و نهرازیبوونێن جادێ، ههروهسا دێ دهرفهتێ ژدهست دهین ژبهركو دهلیڤه ههموو گاڤا یا بهردهست نابیت، نوكه دهلیڤه ل باره چنكو رهوشا دهڤهرا رۆژههلاتا ناڤین ب سایا شهرێ دژی تیرۆرێ دهولهتێن داگیركهرێن كوردستانێ پیرۆزیا سنوورێن خوه ژ دهستدانه و ژبلی ژ دهستدانا ههژموونا ل سهر راگرتنا لێكترزانا جڤاكی و جڤاكێن ڤان دهولهتان ئێدی ب دهستودارێ بهرێ نكارن ب ههڤڕا كار بكهن و پێكڤه بژین، لهوما دڤێت رژدی ل پرۆژێ ریفرانۆمێ بۆ خهلكێ كوردستانێ بهێته دیاركرن چنكو خهلكهك نهیێ ئامادهیه بهردهوام یاری ب ههستێن وان بهێته كرن ب ناڤێ دهولهتبوونێ و پرۆژێن نهتهوهیی و دێ راستیا بابهتی كهڤیته دگومانێدا.
ل ههرێمێ مه هیچ سازیهك نینه ههموویان كوم بكهت و نوونهراتیا ههلویست و بریارا سیاسی نیشتیمانی بكهت، ههروهسا رهوشا دارایی و سهروبهرێ ئابووریێ كوردستانێ ژی ژ بابهتێ گشتپرسیێ جودا نابیت، ئهڤجا دڤێت حوكمهت پتر بزاڤێ بكهت بۆ باشتركرنا رهوشا ئابووری، تا خهلك بێژیت بهلێ بۆ سهربهخوَیی ، و ل بن گڤاشتنێن قهیرانێن ئابووری و سیاسی جودابوونا ژ عێراقێ ب نهخێر ل قهلهم نهدهت، و ئهو باوهری ل دهڤ پهیدا ببیت كو كورد و سهركردایهتیا سیاسی یا نوكه شیانێن ئاڤاكرنا دهولهتێ و برێڤهبرنا وێ ههنه، دڤێت باش بزانین نه ئهنجامدانا گشتپرسیێ دێ بهلانسا هێزێ د بهرژهوهندا بهغدا دا بیت.
یا پێدڤیه ههرێما كوردستانێ بزووترین دهم ژڤان و میكانیزما گشتپرسیێ دیار بكهت، دگهل دیاركرنا دهڤهرێن گشتپرسی ڤهدگریت، و پێنگاڤێن پشتی دیاربوونا ئهنجامان، ههروهسا بشێت برهنگهكێ باش بۆ خهلكی روَهن بكهت، مهرهم ژ ڤێ گشتپرسیێ چیه؟ ئهو ئاستهنگێن دكهڤنه د رێكا گشتپرسی و دهولهتبوونێ دا دهست نیشان بكهت، و بزاڤا راكرنا وان بكهت و ههموو پێكهاتهیێن ئاینی و نهتهوهیی و ههموو پارتێن سیاسی ل ههرێما كوردستانێ نهچار بكهت رایا خوَیا راست و روَهن ئاشكهرا بكهن كا دگهل گشتپرسیێ و دهولهتبوونێ نه یان وان هندهك بوَچوون و داخوازێن دی ههنه؟ ب دیار كرنا دهم و ساتێن گشتپرسیێ دێ پارت و لایهنێن دگهل ڤی پرۆژهی نهبن كهڤنه بن گڤاشتنێن جڤاكێ كوردستانێ و نیشتیمانی بوونا وان ئێخته ل بن پرسیارێ و ههژموونا وان دێ بهرهڤ نهمانێ چیت، چنكو ریفراندۆم پێناگاڤا ئێكێ یه بهرهڤ دهولهتبوونێ كو خهون و ئارمانجا ههر تاكهكێ كورده
