گـۆتـنەك بـۆ گـەنـجان
سەردار هێتووتی
دبێژین چیە ئەوا پێدڤی بهێتەكرن؟ ئەرێ ئەوا پێدڤی دڤێت هەر بهێتەكرن؟ گەلەك پرسیار و مژارێن جودا خۆ د ناڤا مێشكێ مرۆڤی دا دلڤینن، هندەك جاران دەما هزر د ڕابووری دا دكەین، دبێژین: بۆچی ئەڤ كارە مە نەكر؟ كی بوون ئەگەر كو ئەم نەشیاین وی كاری ئەنجام بدەین؟ ئەرێ دەم بۆ بەرێ دێ زڤریت؟
گەنج هێز و لڤینەرێ/ا جڤاكی یە، ئەوە دشێت گوهۆرینان پەیدابكەت و ڕێكا بەرەڤ پێش و نەراوەستیانێ بگریتە پێشبەری خۆ، ئەگەر كارێن مەزن كەسێن مەزن ل پشت بن، چ پێنەڤێت ستوونا هەرە ب هێزا وان كەسان تەخەكا گەنجە كو شیاینە پێلا بەرەڤ ئاراستێ وان دڤێت بگوهۆرن و ئارمانجێ بدەستڤەبینن، پا ل ڤی دەمی چیە ئەوا پێدڤی بۆ ڤی سەردەمی بكەین.. بخوینین. باوەرنامێ وەربگرین. كار بكەین، برەڤین؟ یانژی بنڤین و خەمێن دونیایێ ل پشت سەرێ خۆ بهێلین؟
هێلانا خەمێن دونیایی ل پشت سەری، هێشتا د ژییەكێ بچووك و كێم دا مرۆڤی وەكی ناڤسالڤە چوویەكی ددەتە دیاركرن، ڕاستە وی خەم نەهەلگرتینە، لێ ئارمانج ژی د ژیانێ دا نەبوویە، دبێژن: بخوینن، بەس ڤێ خواندنێ ژی بەرهەم نینە، كێ ب نانێ خواندنێ تێر خوارییە؟ هەلگرێن باوەرنامەیان دبرسینە، نەشێن پاریەكێ نانی بۆ خۆ و زارۆكێن خۆ پەیدا بكەن، دیارە ئەگەر ب گۆرەی هزرا وان ل جڤاكی بنێرین دبیت تا ئاستەكێ بلند ئەڤ گۆتنە ڕاست دەربچیت، چونكی ئەڤێن خواندنی پتری ل هیڤیا دامەزراندنێ و كارەكێ گشتینە د كەرتێ میری دا، ئەو هزر دكەن ژیانا وان بۆ هەفت بابان پشتی وان مسۆگەرە، لەوما كار دكەن بهێنە دامەزراندن. ژ بەر خەوێ و نەبوونا باوەرنامێ، گەلەكان ڕێكا ڕەڤێ گرتیە و قەستا دەرڤەی وەلاتی كرییە، من ل ڤێرە مەرەم پێ نینە بەحس ل سەر باشی و خرابیێن دەرڤە بكەم، چونكی مرۆڤێن مەزن ل دەرڤە چێبوونە و ئەڤرۆ بوونە شانازییا گەلێ خۆ، بەس ئەرێ ب تمامی ئەڤ ڕێكە بەسە بۆ تێركرنا ئارمانجا ژیانێ؟ دبیت بۆ هندەكا ئەرێ و بۆ هندەكان نەبیت، چونكی د ژیانا خۆ دا خودانێن ئەرێكرنێ ئاستەنگان دبینن و وان ئاستەنگان دشەقینن و دگەهنە ناڤەندا وان دڤێت و خۆدانێن پەیڤا نە ژی ژیانێ ل بەر خۆ ڤەكری دبینن، لێ وێ ژی گۆتنەك و سەد ڕاستیێن ڤەشارتی هەنە.
ئەوا پێدڤی بهێتەكرن، دڤێت ب تنێ كاركرن بیت بۆ بەر ب ئارمانجێ، ئەڤ كاركرنە ل كیڤە بیت، ب شەڤ بیت یان ڕۆژ بیت، ل ئاراستێ ژوور یان ژێریا ئەردی بیت نەگرنگە ب تنێ یا گرنگ ئارمانج یا دیاربیت و بۆ وێ ئارمانجێ كاربكەی، هزرا ڤەمانێ و كەڤنەشۆپیێ و هزرێن نەرێنی و عەشیری و دویڤەلانكیێ هەمیان ل پشت گوهڤە بهاڤێژە و ب تنێ بۆ ئارمانجێ كاربكەن.
گەنج ل ڤی دەمی دیاردبیت، چونكی ئەوە ڤەپەنیا دكەتە ڕاستی و ڤێ ڕاستیێ د مێشكێ جڤاكێ دا دلڤینیت و جڤاكێ بۆ پێش ڤە دهاژۆت، ئەوە ئاستەنگان ل پێش خۆ دشەقینیت و دبیتە پێشەنگ و ژبۆ ڤان مەرەما دڤێت د سەری دا خۆ ب چەكێ خواندنێ بهێز بكەی و پاشای بەرەڤ پێنگاڤێن دوویێ و سیێ ڤە بچی كو ئەو ژی د ناڤا جڤاكێ دا كەسەكێ دیاربی و ببیە ئاخڤتنكەر و ڤەلڤینەرێ تەخا خۆ.
د رابووریێ مەدا كەس نەبوو، ئاستەنگ ل سەر ڕێكا مە ب تنێ ئەم بووین، كەسێ ڕێك ل مە نەگرت ب تنێ مە ب هزرێن ڤەمایی و ترسێ و شەرمێ و ژ دەستدانێ ڕێك ل خۆ گرتیە و دڤێت تەخا نوكە یا گەنجان ڤێ سەركێشیێ بكەن و وان ئاستەنگا نەبینن و نەترسن و بەرەڤ پێشڤە بچن و قەیدێن باژێربوونیێ و گونداتیێ و هزرێن بەرتەنگ ببرن و بەرەڤ باژێرێن مەزن ڤە بچن و د ناڤا ناڤەندێن هزری و رەوشەنبیری دا دیارببن، چونكی نوكە ئەو دەمە یێ جڤاك پتر ژ هەمی دەما پێدڤی ب گەنجی هەی.
