گـۆتـنەك
ئیسماعیل بادی
ئەنوەرێ مایی، وەكو مەلا، دیرۆكنڤیس، هۆزانڤان و پەروەردەكار و هونەرمەند؛ ئێك ژ وان كەسان بوویە، كو بەری دەمێ ئەو تێدا؛ دژییا. هەمی كارێن وی ئەنجامداین هەكە باش هزرێ تێدا بكەین ل دویڤ ئەو جهێ لێ مەزن بوویی و تێدا پەروەردە بووی، نە یا وێ چەندێ بوویە وەكو كەسەك بشێت وان كارێن مە ئاماژە پێ دایی هەمیان بكەت، هەكە بەری دەمی نەڕاكر بیت.
ئەنوەرێ مایی ل هەر جهەكێ لێ كار كربیت، خزمەتەك ل وی جهی ل پاش خۆ هێلایە. ئەو خزمەت ژی جۆراوجۆر بووینە. دەما ل دەڤەرا ئامێدیێ، ژ بلی خزمەت و ئەنجامدانا كارێ خۆ یێ فەرمی یێ رۆژانە، د گەل دا ژی كارێ شانۆڤانیێ كرییە و ئەو ل وێ دەڤەرێ دبیتە كەسێ ئێكێ ئەو كارێ هونەری ئەنجامدای.
هەروەسا دەما چوویە رادیۆیا كوردی ل باژێڕێ بەغدا، دیسا هندەك سروود و ستران تۆماركرن و كەسێن مالباتا خۆ ل گەل بربوون دا ببنە كورس و بشێت ئەو كارێ وی ڤیایی ئەنجام بدەت، باشترین كارێ وی سروودا (وەلاتێ مە كوردستانە) كو ب د بنەڕەتدا هۆزانا وی یە و ژ وێرێ گەهشتییە رادیۆیا ئێریڤانێ.
هەر ل دۆر سترانێ باشترین بەڵگە و دیدەڤان سترانبێژ عیسا بەرواری، كو ناڤدارە ب سترانا (خەج و سیابەند)ی، ل سالێن حەشتییان دا د دیدارەكێ دا ل تۆمارگەها خۆ ل باژێڕێ مویسل، گۆت كو پەیڤێن وێ سترانێ مەلا ئەنوەرێ مایی داینە من و ژێ خواستییە بكەتە ستران.
دیسا ل دەستپێكا دامەزراندنا كارێ خۆ، ل دەڤەرا بارزان و مێرگەسۆرێ، ژبلی بدەستڤەئینانا حەزژێكرن و خۆشتڤیاتییا خەلكێ دەڤەرێ، د گرێدانا پەیوەندییان دا ل گەل بارزانیێ نەمر و كەسایەتیێن دیتر، ببوو هاریكارەك كو بشێت گەلەك كاران بكەت و خزمەتا خەلكەكی بكەت، باشترین گرۆڤ بۆ گۆتنا مە ئەو نامەیا وی نڤیسی بۆ بارزانیێ نەمر كو سەرۆك بارزانی دپەرتووكا خۆ دا دەقێ وێ بەلاڤكرییە. هەتا دەما ژ وێ دەڤەرێ زڤڕییەڤە ژی، باشترین نموونە ژ بستەییا وی ل گەل بارزانیێ نەمر، نڤیسینا نامەیانە د ناڤبەرا وان دا هەبوویە.
پەرتووكا (محاضرە عن الاكراد فی الصین)، وەكو مزگینی دبێژن جارا ئێكێ یە ئەڤ پەرتووكە دهێتە كوردیكرن و بۆ چاپێ یا بەرهەڤە، هەر چەندە هەتا نوكە ب زمانێ عەرەبی، دو جاران هاتییە چاپكرن، بەلێ ب زمانێ كوردی هێشتا نەهاتییە چاپكرن. لەوا دبێژین گەلەكا گرنگە كو بەرهەمێ لێخۆشبووی یێ چاپكری؛ سەرۆژنوی ب رەنگەكێ جوان و ب سەروبەر بهێتە چاپكرن ڤە، هەروەسا بۆ سەر زمانێ كوردی بهێنە وەرگێڕان، داكو نفشێ نوی ژی مفای ژێ وەربگرن. كو جهێ مخابنیێ یە هەتا نوكە ئەو بەرهەمێن گرنگ نەبووینە كوردی. هەروەسا ئەو دەسنڤیس و تشتێ مایی ژی هەمی بهێتە ساخكرن و چاپكرن، دا ژ بەرزەبوونێ بهێتە رزگاركرن، كو مخابنە هەتا نوكە د جه دا مای.
