گـۆڤـارا سـڤۆرە و شـەمـالكا 27
پـەری بـەرواری
گۆڤارا سڤۆرە ب شانازیڤە ل رۆژەكا گرنگ د مێژوویا گەلێ كورد دا ئێكەم هژمار دەركەتی، ئەو ژی ل رێكەفتی 22/4/1998ێ كو دبیتە رۆژا سەد سالیا رۆژنامەگەریا كوردی. ل سالا 1898 و ل 22 نیسانێ ئێكەم هژمارا رۆژناما كوردستان ل باژێرێ قاهیرە ل وەلاتێ مسرێ ل سەر دەستێ (میر مدحەت بەدرخان) دەركەت، ئەڤ بۆیەرە دێ مینیت خالەكا گرنگ د دیرۆكا مللەتێ كورد دا، جهێ شانازی و سەربلندیێ یە ل وی دەمی ڤێ رۆژنامێ خزمەتا گەل و وەلات و كولتۆر و زمانی كری.
ئێكەم گۆڤارا زارۆكان د رۆژنامەگەریا كوردی دا دەركەتی؛ گۆڤارا (گر و گالی مندالانی كورد) بوو ل رێكەفتی 21/4/1946 ل سەردەمێ كۆمارا كوردستان، بەلێ ب مخابنیڤە بتنێ سێ هژمار ژێ دەركەتن، یا ئێكێ ل 21 نیسانێ یا دویێ ل 21 ئەیارێ یا سیێ ل 21 خزیرانا سالا 1946، سەرنڤیسەرێ وێ (مەلا قادر مودەریسی) بوو.
پشتی بۆرینا 52 سالان و ئەو ڤالاتیا كەتیە رۆژنامەگەریا زارۆكان، گۆڤارا سڤۆرە ژ دایكبوو و ئەو ڤالاتی تژی كرەڤە ب رێكا چیرۆك و هۆزان و سیناریۆ؛ خزمەتا زارۆكی و جیهانا وی یا ئەدەبی و رەوشەنبیری كریە و حەتا ئەڤرۆ یا بەردەوامە ب ناڤەرۆكەكا تێر و تەسەل و بابەتێن پەروەردەیی و رێكوپێك و دیزاینەكا سەردەمیانە، زارۆك تا رادەكی یێ پشت گوه هاڤێتیە د رۆژنامەگەریا كوردی دا و هند پویتە ب جیهانا وی یا ئەدەبی نەهاتیە دان، بتنێ د گۆتاران دا زارۆك هاتیە دیتن، گۆڤارا سڤۆرە دهێتە هژمارتن ئێكەم گۆڤارا تایبەت ب زارۆكان ڤە پشتی گر و گالی مندالانی كورد، كو بێ ڤەقەتیان دەركەتیە و خزمەت كریە. هندەك گۆڤار و رۆژنامە و كەنالێن زارۆكان هەبووینە لێ بەردەوامی نە دایە وەشانا خۆ یان ژی وەرزی بووینە.
گۆڤارا سڤۆرە دەرفەت دایە ژمارەكا باش یا زارۆكان كو بابەت و هەست و پەیامێن خۆ د گۆڤارێ دا بەلاڤ كەن، تا وی رادەی گەلەگ ژ وان نوكە گۆتاران بۆ گۆڤارێ دنڤیسن و بووینە خودان قەلەمەكێ باش.
ب هیڤیا وێ چەندێ پتر پویتە ب زارۆكی بهێتە دان، چۆنكی زارۆكێ ساخلەمێ ئەڤرۆ پاشەرۆژا سبەهیا جڤاكەكێ ساخلەمە.
