گـەر ئـەز نەبـم

رەمەزان ئیسماعیل گەرەگوهی

گەر ئەز نەبم..
كەسەك نەشێت
ل ڤێ ئەلند و سحارێ
پاییزا ڕویك و دێمێن تە و
قەشـــاڤیبوونا لێڤێن تە
ژ نوكە وێڤە
لێ بكەتە تێرخوەر وخێڤە
جارەكادی گڕنژین و
ئاشنابینا و ئەشق و ڤینا
ژۆردا پێدا بینیت خوارێ
گەر ئەز نەبم..
كەسەك ناهێت
ل ڤێ داوی یا بهارێ
تە ببەت ناڤ زۆزانێن سار
وی سینگێ تە
ئەوێ گوڕی و ئاگر پێڤە
لێ بكەت نختە و ئاخلێڤە و
گولۆزینكێن ئاڤا تەزی
ڤێدا بینیت
مینا خوناڤ و خویسارێ
گەر ئەز نەبم..
كەسەك نەشێت
ل سەقایێ ئەڤێ جارێ
تەڤ گۆتن و ژڤانێن تە
شوینا كول و كۆڤانێن تە
لێ بكەتە خۆشی و ئارامی و
بۆ تە بزڤڕینیت هەدارێ
گەر ئەز نەبم..
كەسەك نەشێت
ل ڤێ هەلكەفت و دیدارێ
ئەڤان هەمی دەرد و ژانا
پشتی تەڤ خەم و كۆڤانا
جارەكا دی ب ئێكجاری
تە ببەت جیهانا حەزا و
ژ تە دویركەت گری و زێمارێ
گەر ئەز نەبم..
كەسەك نەشێت
ل ڤی بەربەركێ ئێڤارێ
بۆ تە كەزی و بسكا شەكەت
دۆست و هەڤالا خڕڤەكەت
تە بكەتە خاتوینا مالێ و
هەمی پێكڤە
ب ئاوازێن خۆش
بــۆمـە بێژن نار هـــەی نارێ.

کۆمێنتا تە