گـەفێن ل سـەر ڕۆژاڤـا زێدە دبـن
عـەمـەر هـەرگـۆشـی
وەسا دیارە كو ل چەند مەهێن بۆرین دا حوكمەتا سووریا و هەسەدە؛ نەكارینە ل دانوستانێن خۆ بگەهن ئارمانجێن خۆ ،ژ بەر وێ ئێكێ ب تایبەت ل دەردۆرا دێرەزۆرێ ژمارەكا زۆرا هێزێن سەربازی یێن حوكمەتا سووری دبەرهەڤن بۆ شەڕی و ب ئەگەرەكا مەزن ڤە هێرشەكا مەزن دێ كەنە سەر هێزین هەسەدێ و رەنگە دیسا ناڤچە تووشی شەڕ و مالوێرانیان ببیت.
گەلێ كوردستانێ ل بەندێ بوو دانوستان و رێككەفتنێن د ناڤبەرا برێز مەزلۆم كۆبانی و ئەحمەد شەرع ئەنجامێن باش هەبن و ل دویماهیێ ب شەڕ و مالوێرانیان بینن و گەلێ كوردستانێ ژی ب مافێن خوە شاد ببیت، جهێ داخێ یە كو پشتی دەمەكی زۆر و گفتگۆیێن بێ ئەنجام ژنویكا بەرهەڤیێن شەڕی دكەن و دیسا ناڤچەیێ د خوین و رۆندكان دا بخەندقینن و جارەكا دی وەك هەرجار شەڕەكی نارەوا ل سەر گەلێ مە بسەپینن و زێدەتر تووشی مالوێرانی و كاڤلكاریێ بكەن. گەلێ كوردستانێ ل رۆژئاوا چەند سالە د كاودانێن خرابێن ئابۆری و سیاسی دا دژیت و مالوێرانی و دەردەسەریێن زۆر یێن دیتین و هەمی جاران ل هیڤیا هندێنە ل دویماهیكا تۆنێلێ رۆناهیێ ببینن و ب ئازادی و تەناهی و بەختەوەریێ شاد ببن و وەكی هەرنەتەوەكی دی ببنە خودان مافێن نەتەوەیی و چو جاران شەڕ و كاڤلكرن ل سەر نەهێنە سەپاندن و ئاشتی و برایەتی جهێ زۆردایێ و تەپەسەریێ بگریت.
جهێ داخێ یە كو رۆژ بۆ رۆژ رەوش ئالۆزتر لێدهێت، لویلیێن دەبابه و تۆپان پتر ئاڕاستەی سینگێ وان دكەن و گەف و هەرەشەیان ل سەر زێدە دكەن.
ئەوا راست بیت گەلێ مە ل رۆژئاڤا كێشە و ئالۆزیێت زۆر یێن هەین و برینا وان زۆرا كویرە، وان پێدڤی یا ب چارەسەریا و دەرمان هەی، وان پێدڤی یا ب هەڤكاریان و هەمی ئاشتیخوازان هەی، سنوورەكی بۆ وێ زۆرداریێ و غەدرێ دەینێن یاكو ل وان دهێتەكرن و رێكا گەهشتن ب سەرفرازیێ بۆ وان ب ساناهی بكەن، ئەڤرۆ هەر هەڕەشەیەك ل سەر وان كارەساتێن مەزن؛ دێ لێ چێبن و برین دێ قۆلتر لێهێن و خەم و مەینەت ژی دێ گەلەك زۆرتر بن.
ئەڤرۆ پێدڤیە جڤاكا نێڤدەولەتی ئاگەه ل رەوشا رۆژئاوا هەبیت و خەمەكا مەزن لێ بخۆت؛ وە ئەركێ هەمی دیموكراتخواز و ئاشتیخوازێن جیهانێ د هەوارا كوردێن رۆژاڤا بچن و نەهێلێن وەك هەرجار چ زۆردار و دیكتاتۆر یارییان ب چارەنڤیسێ گەلێ كوردستانێ بكەن و كو د دیرۆكا خۆدا ئاشقێ ئاشتیێ و برایەتیێ بوویە.
