گهرا دویێ دا یین دوهی و ههڤال ئهڤرۆ ههڤركن
ئهڤرۆ،
چاڤهڕێ یه ئهڤرۆ ههڤڕكیێن گهڕا دویێ ژ قۆناغا ئێكێ یا كۆمان ژ قارهمانیا یانێن ئۆرۆپا قارهمانێن خولا چامپیۆنز لیگ ل یاریگههێن جودا یێن كێشوهرێ ئۆرۆپا بهێنه ئهنجامدان و یاریا گلاسكۆ رێنجێرز یا ئیسكۆتلهندی ل گهل ناپۆلی یا ئیتالی هاتیه پاشخستن.
كۆما ئێكێ
ل یاریگهها خوه ئانفێلد یانا لیڤهرپۆل یا ئنگلتهرا د كاودانهكێ خراب دا دێ مێڤانداریا یانا ئهیاكس ئهمسترام یا هۆلهندی كهت، خودانێن ئهردی د یاریا بوری دا تووشی خوسارهتیهكا مهزن و نهچاڤهڕێ كری بوون ههمبهری یانا ناپۆلی یا ئیتالی ب چار گۆلان بهرامبهر گۆلهكێ، بۆ ڤێ یاریێ دێ لبن گڤاشتنێن جهماوهرێ خوه بن ژبۆ قهرهبوویا خالێن یاریا بوری و سهركهفتنا ئێكێ و ڤهگهڕیان بۆ ناڤ ههڤڕكیان دا، لێ یانا مێڤان ئهوا سهركهفتنهكا مهزن ل سهر كلاسكۆ رێنجێرز یا ئسكوتلهندی ئینایی ب چار گۆلێن باقش پاریهكێ ب سانههی نابیت بهلكو دهلیڤه بۆ یانا هۆلهندی ژی پهیدابوویه كو سهركهفتنێ بینت پێخهمهت گهشكرنا هیڤیێن دهربازبوونێ بۆ قۆناغا دویێ، راهێنهرێ لیڤهرپۆل یۆرگن كلۆپ ب سهركێشا یاریزانێن خوه محهمهد سهلاح داخوازكرینه جهماوهرێ خوه ئاشت بكهن ئهوا دێ یاری ل دهمژمێر 10ی شهڤ هێته ئهنجامدان، ههرچهنده بڕیار بوو د ڤێ كۆمێ دا یانا گلاسكۆ رێنجێرز مێڤانداریا یانا ناپۆلی بكهت لێ بۆ سوبههی چارشهمبی هاتیه پاشخستن ژبهر پێشهاتهیێن وهغهرا دووماهیێ یا شاهژنا بریتانیا ئێلیزابێس یا دویێ، یانا ئسكۆتلهندی ئهوا دیاریا خوه یا ئێكێ دا تووشی خوسارهتیهكا مهزن بوویی دێ ل یاریگهها خوه یانا ناپۆلی یا ئیتالی ل دهمژمێر دههێ شهڤێ مێڤان كهت، یانا ئیتالی ب زاخهكا بلند هێته دناڤ یاریێ دا پشتی سهركهفتهكا مهزن ل سهر لیڤهرپۆلێ ئینایی.
كۆما دویێ
د یاریهكا بهێز یا ڤێ كۆمێ دا یانا ئهتلهتیكۆ مهدرید یا ئسپانی دێ بیته مێڤانا یانا بایرن لیڤهركۆزن یا ئهلمانی، خودانێن ئهردی دیاریا ئێكێ دا ب گۆلهكێ تووشی خوسارهتیێ بوون ههمبهری كلۆپ برۆچ یا بهلجیكی لێ بۆ ڤێ یاریێ دناڤ ئهرد و جهماوهرێ خوه دا ئهركێ وێ ب سانههی نا بیت ههمبهری تیمهكا خودان هێز و سهربۆر ئهوا د یاریا خوه یا ئێكێ شیابوو سهركهفتنێ تۆماربكهت و ههروهسان د خولا ئسپانیا دا ب چار گۆلان سهركهفتنهكا دی ئینا بهری دیدارا ئهڤرۆ كو هێزهكا دی دایه یاریزانێن تیمێ پشتبهستن ل سهر ستێرێن خوه گرێزمان،كاراسكۆ و گابریێل ڤییگا، لێ نه پشكداریا گۆلپارێز ئۆبلاك، خوسێی ماریا خیمینێز، جواو فلیكس و گۆمان ل سهر پشكداریا ساڤیتچ و ریگیلۆنی ترسهك ئێخسته د دلێ جهماوهرێ یانێ دا، یاریا دویێ یا ڤێ كۆمێ دێ دناڤبهرا ههردو یانێن پۆرتۆ یا پۆرتۆگالی خودانێن ئهردی و كلۆپ برۆچ یا بهلجیكا، یانا پۆرتۆ دێ بۆ سێ خالێن یاریێ هێته دناڤ یاریگههێ و قهربوویا خوسارهتیا ئێكێ لێ ئهركێ وێ ب سانههی نابیت ههمبهری یانا بهلجیكایێ ئهوا دهستپێكهكا باش ب سهركهفتیانه هاتیه دناڤ چامپیۆنزێ دا، ئهڤ یاریه ب سانههی نابیت بۆ ههردو تیما و ههتا خولهكێن دووماهیێ دێ شهڕی بۆ خالێن یاریێ كهن، بۆ زانین ههردو یاری دهمژمێر دههی شهڤ هێنه ئهنجامدان.
كۆما سێیێ
كۆما سێیێ ئهوا ههموو شرۆڤهكارێن وهرزشی ب كۆما مرنێ و ئاگرین د چامپیۆنزا ئهڤ ساله دا پێناسهكرین ژبهر سێ مهزنه یانێن ئۆرۆپا ئهوێن بهربژار بۆ ناسناڤی، یاریا بهرشهلۆنا و بایرن میۆنخ دهێته هژمارتن كۆبیتكا یاریێن ڤێ گهڕی و ههموو جهماوهرێ وهرزی چاڤهڕێ ڤێ یاریێ بن، ل یاریگهها خوه ئهلیانز ئهرینا بایرن میۆنخ یا ئهلمانی دێ مێڤانداریا بهرشهلۆنا یا ئسپانی كهت، بایرن دهمهكێ نهخۆش د خولا ئهلمانیا دا دهرباز دكهت ئهوا ژ شهش یاریان بتنێ 12 خال كۆمكرین ئهڤچهنده بوویه جهێ دلگرانیا پشتهڤانێن یانێ و ترسا وان ئهوه یاریا ئهڤرۆ دا ل گهل بهرشهلۆنا بهردهوامیێ بدهنه ئهنجامێن لاواز، ههرچهنده مێژۆیا یاریێن دناڤبهرا وان د بهرژوهندیا یانا ئهلمانی دایه كو ژ 13 یاریێن د ههموو ههلكهفتێن ئۆرۆپایێ دا هاتینه كرن بایرن نهه جاران سهركهفتن تۆماركریه ههمبهری دو خوسارهتیا و وهكههڤیهكێ و مهزنترین سهركهفتن یا وهرزێ 2020 بوو د قۆناغا چارێك دووماهیا چامپیۆنزێ دا دهمێ یانا ئهلمانی شیایی ب ههشت گۆلان بهرامبهر دو گۆلان سهركهفتنێ بینت، لێ بۆ یانا بهرشهلۆنا یاریا ئهڤرۆ دێ بیته مێژۆیهكا دی ژبهركو شیایه بهێزترین چهكێ وێ یێ گۆلكهره رۆبێرت لیڤاندۆڤێسكی ژێ وهربگریت كو ههڤالێ بهرێ بایرنێ بوویه دۆژمنێ نوكه، لهورا ههموو پێشبینی دهێنه كرن بتنێ فیركا دادڤانی ئهنجامێ یاریێ ئێكلاكهت، ههردو یانه د گهڕا ئێكێ دا سهركهفتن تۆماركربوون لیڤاندۆڤێسكی شیابوو هاتریكێ بینت و تیما خوه ب پێنچ گۆلان بهرامبهر گۆلهكێ سهركهفتنێ ل سهر فیكتۆریا بلزن بینت لێ یانا ئهلمانی ژی د یاریهكا بهێز دا ل گهل ئهنتهر میلانێ ب دو گۆلان بێ بهرامبهر سهركهفت بوو، بهرشهلۆنا ب هیڤیێن مهزن پشتی بۆ وهرزێ نوو كۆمهكا باشترین یاریزانێن ئۆرۆپا ل خوه كۆمكرینه ژوانا یێ پۆلهندی رۆبێرت لیڤاندۆڤێسكی، راڤینا، ممفس دیبایی، دی یۆنگ، لێ یانا ئهلمانی ژی دێ پشتبهستنێ ب ستێرێن خوه تۆماس مۆلهر،سادیۆ مانی، لیروی سانی، ماتیاس دی لێخیت، ئهڤ یاریه دهمژمێر 10ی شهڤ هێته كرن، دچارچووڤێ ههمان كۆم دا یانا ئهنتهر میلان یا ئیتالی دێ بیته مێڤانا فیكتۆریا بلزن یا چیكی، ئهنتهر دێ ب جهنگێن شكهستێ و هیڤییا ڤهگهڕیانێ هێته دناڤ یاریگههێ دا پشتی دیاریا ئێكێ دا تووشی خوسارهتیێ بوویی لێ بۆ ڤێ یاریێ راهێنهرێ تیمێ سیمیۆنی ئینزاكی ڤهگهڕیانا لۆكاكویی ب ڤهگهڕیانا هێزا تیمێ دا زانین و دیاركر ژبلی سهركهفتنێ چو هزرێن دی ناكهن و نابیت خالان ژ دهست بدهین، یانا چیكی دناڤ ئهرد و جهماوهرێ خوه دا شیانێن ههین ههموو ڕێكا ل ئهنتهرێ بگرن، بۆ زانین یاری دهمژمێر 7:45 خولهكێن شهڤ هێته ئهنجامدان.
كۆما چارێ
دڤێ كۆمێ دا دێ ههڤڕكی دناڤبهرا دو یانێن رێزێن ئێكێ و دویێ بۆ پاراستنا سهرێ لیستێ هێته كرن ئهو ژی دهمێ یانا سپۆرتینگ لهشبۆنا یا پۆرتۆگالی مێڤانداریا یانا تۆتنهام یا ئنگلتهرایێ دكهت، ههردو تیم د گهڕا ئێكێ دا شیابوون سهركهفتنێ تۆماربكهن و ب سێ خالان رێزێن پێشییێ بهێن، سهركهفتنا ئێك ژ وان دێ سهرێ لیستێ پارێزیت لهورا دێ یاریهكا ب ههڤڕكی بیت بۆ سێ خالان، ئهڤ یاریه ل دهمژمێر 7:45 شهڤ هێته كرن، ژلایێ خوهڤه و دیاریهكا دی دا یانا ئانتراخت فرانكفۆرت یا ئهلمانی دێ بیته مێڤانا مارسێلیا یا فرهنسی، ههردو یانه دێ بۆ قهرهبوویا سێ خالێن یاریێ و خوه قۆرتالكرن ژ رێزا دووماهیێ، ئهڤ یاریه دهمژمێر دههی شهڤ هێته ئهنجامدان.
