گه‌شتێن عومرێ ب تڕۆمبێلێ هاتنه قه‌ده‌غه‌كرن
هه‌ولێر، قائید میرۆ:
به‌رپرسه‌كێ وه‌زاره‌تا ئه‌وقاف و كاروبارێن ئایینی ل حوكمه‌تا هه‌رێما كوردستانێ هۆشداریێ دده‌ته كۆمپانیێن عومرێ، كو نابیت گه‌شتێن عومرێ بۆ وه‌لاتێ سعودیێ ب رێیا تڕۆمبێلێ بهێنه ئه‌نجامدان و دبێژیت: ب تنێ رێك دهێته‌دان ب رێیا ئاسمانی گه‌شتێن عومرێ بهێنه ئه‌نجامدان و به‌روڤاژی دێ پێڕابوون هه‌مبه‌ر كۆمپانیان هێنه كرن.
شێخ نیاز راغب، رێڤه‌به‌رێ گشتیێ حه‌ج و عومرێ ل وه‌زاره‌تا ئه‌وقاف و كاروبارێن ئایینی بۆ رۆژناما ئه‌ڤرۆ دیار كر، ل هه‌رێما كوردستانێ 150 كۆمپانیێن حه‌ج و عومرێ هه‌نه و هاتینه تۆماركرن ب مه‌ره‌ما ئه‌نجامدانا گه‌شتێن عومرێ و گۆت: “گرێبه‌ستا حوكمه‌تێ ل گه‌ل كۆمپانیێن عومرێ ئه‌وه كۆمپانیا ب رێیا ئاسمانی عومره‌كاران بۆ ئه‌نجامدانا گه‌شتێن عومرێ بۆ وه‌لاتێ سعودیێ ڤه‌گوهێزن، ئه‌و ژی ب رێیا هه‌ردو فڕۆكخانێن هه‌ولێر و سلێمانیێ، به‌روڤاژی ب هیچ شێوه‌یه‌كی رێك ناهێته دان كۆمپانیا ب رێیا هشكانی عومره‌كاران بۆ وه‌لاتێ سعودیێ ڤه‌گوهێزێن”.
شێخ نیاز راغب گۆتژی: “ئه‌نجامدانا گه‌شتێن عومرێ ب رێیا تڕۆمبێلان یا ب مه‌ترسیه، ژ به‌ركو رێیا درێژه، له‌و ئه‌م رێكێ ناده‌ین گه‌شتێن عومرێ ب تڕۆمبێلان بهێنه ئه‌نجامدان، مه‌ره‌ما مه ژی ب ڤێ چه‌ندێ پاراستنا ژیانا وه‌لاتیانه، له‌وڕا ژی ئه‌ڤ ساله ژی دێ گرێبه‌ست ب تنێ بۆ گه‌شتێن ئاسمانی بیت و گه‌شتێن هشكانی ناهێنه ئه‌نجامدان، بهایێ گه‌شتان بۆ عومرێ هاتیه دیاركرن و ژ 700 دۆلاران ده‌ست پێ دكه‌ت ل گوره‌ی خزمه‌تگوزاریان بهایێ عومرێ بلند دبیت”.
