گه‌له‌ك ژن دخوازن بهێنه هولێن له‌شجوانیێ، لێ مالێن وان رێكێ ناده‌نێ
زاخۆ، عه‌لی حاجی:
سارا خه‌یری، راهێنه‌را یاریا له‌شجوانیێ، د دیداره‌كێ دا بۆ رۆژناما ئه‌ڤرۆ گۆت: پێدڤیه هه‌موو كچ ده‌ست ب وه‌رزشێ بكه‌ن و هه‌تا نوكه وه‌كو پێدڤی ره‌وشه‌نبیریا وه‌رزشێ دناڤ كچان دا به‌لاڤ نه‌بوویه و پرانیا ئافره‌تان نوكه بتنێ حه‌ز ل سه‌ر وه‌رزشێ هه‌یه نه‌كو ره‌وشه‌نبیریا وه‌رزشی، ژبه‌ر ڤێ چه‌ندێ گه‌له‌ك جاران هه‌ر كه‌سه‌ك ژ ده‌ف خوه هنده‌ك تشتان بۆ وان دبێژن ب تایبه‌تی د وه‌رزشا له‌ش جوانیێ دا ئه‌و وه‌كی وان دكه‌ن بێ كو بزانن كو ئه‌ڤ راهێنانه چه‌ند باشن وچه‌ند خرابن و نابیت هه‌ر راهێنه‌ره‌كێ تشته‌كی بۆ وان ئافره‌تان بێژیت ئه‌و وێ بكه‌ن چنكو دبیت ئه‌و راهێنه‌ر د خه‌له‌ت بن و پێدڤیه ئافره‌ت پێزانینێن وه‌رزشی ل ده‌ف خوه په‌یدا بكه‌ن. سارایێ گۆت: د نوكه دا هه‌موو كچان پێدڤی ب وه‌رزشێ هه‌یه ژبه‌ر كو هه‌تا دناڤ مالێ ژی دا وه‌رزش دێ هاریكارێ ئافره‌تێ بیت ژبه‌ر كو وه‌رزشێ كارتێكرنه‌كا ئه‌رێنی ل سه‌ر ده‌روونێ وێ هه‌یه و دێ پتر یا ئارام بیت و گه‌له‌ك گرنك ژی دبینم ئافره‌ت دناڤ هولێن وه‌رزشی دا زێده‌تر ببن.
سارایێ گۆت: نوكه گه‌له‌ك ئافره‌ت دخوازن بهێنه هولێن له‌ش جوانیێ، به‌لێ مالێن وان رێكێ ناده‌نه وان ، پرانیا ئافره‌تان ژی دخوازن رێك و پێكیا له‌شێ وان زوو دروست بیت به‌لێ ئه‌ڤه یا خه‌له‌ته و نابیت ل سه‌ر ڤێ هزرێ بمینیت، ژبه‌ركو ئه‌ڤه دێ بیته ئه‌گه‌رێ گه‌له‌ك نه‌خۆشیان و هه‌تا بۆ له‌شێ وێ ژی باش نینه و پێدڤی یه زێده‌تر ل سه‌ر دروستكرنا له‌شێ خوه یا بهێن فره‌ه بیت.
