گه‌له‌ك ژ گه‌نجێن مه شاره‌زایی ل سه‌ر مۆزیكا كوردی نینه و وه‌سا هزر دكه‌ن مۆزیكا بیانی ژ یا كوردی خوەشتره
ئه‌ڤرۆ، زنار تۆڤی:
مۆزیكژه‌ن ته‌یمۆر وه‌یسی، د ژییێ 47 سالیێ دایه، خه‌لكێ باژێرێ كرمانشانه ل رۆژهه‌لاتێ كوردستانێ، نوكه ل وه‌لاتێ ئه‌لمانیا دژیت، د دیداره‌كێ دا بۆ رۆژناما ئه‌ڤرۆ دبێژیت: خێزانا من خانم سۆما ژه‌نیاره، ده‌مێ ئه‌م ل رۆژهه‌تێ كوردستانێ تووشی چه‌ندین ئاریشه‌یان بووینه و خه‌لكێ ره‌خنه ل كارێ مه دگرت، ژبه‌ركو ئه‌ز و خێزانا خۆ هه‌ردو موزیكژه‌نین و كارێن هونه‌ری ئه‌نجام دده‌ین، به‌لێ پشتی ئه‌م هاتیه ئه‌لمانیا، ئێدی ئه‌ز و خێزانا خۆ، ب ره‌نگه‌كێ ئازادانه كارێن خۆ یێن هونه‌ری ئه‌نجام دده‌ین، هه‌روه‌سا ئه‌ڤه ده‌مێ 13 سالانه ئه‌ز كارێ ژه‌نیاریێ دكه‌م و نوكه گه‌هشتیمه ئاسته‌كێ گه‌له‌ك باش.
ناڤهاتی گۆت ژی: گه‌له‌ك موزیكژه‌نێن كورد یێن خودان شیان وانێن هونه‌ری داینه من و من گه‌له‌ك مفا ژ وان دیتیه، هه‌روه‌سا ئه‌ز ئامیرێ زۆرنایێ و دودكێ و شمشالێ لێ دده‌م، هه‌روه‌سا هیڤیا من ئه‌و بوو، هه‌ر ژارۆكاتیا خۆدا ئه‌ز وان ئامیران بژه‌نم و نوكه ئه‌ز گه‌هشتیمه هیڤیا خۆ د ژیانێ دا، ب هاریكاریا هنده‌ك مامۆستایێن هێژا، زێده‌باری كارێ موزیكێ من فێرگه‌هه‌كا موزیكێ و كارگه‌هه‌كا چێكرنا ئامیرێن تارێ و ته‌مبۆرێ و سازان ل باژێرێ ره‌وانسه‌ر ل رۆژهه‌لاتێ كوردستانێ هه‌یه، هه‌روه‌سا من په‌یوه‌ندیێن باش ل گه‌ل موزیكژه‌نێن رۆژهه‌لاتێ كوردستانێ هه‌نه و ل گه‌ل چه‌ندین گرۆپان من كاركریه، من پشكداری د فیسته‌ڤالان دا كرییه ل رۆژهه‌لاتێ كوردستانێ و ل ده‌رڤه‌یی وه‌لاتی ژی.
ته‌یمۆر هێشتا دبێژیت: مخابن موزیكا ئه‌لكترۆنی و بیانی هاتیه دناڤا موزیكا كوردی دا و ڤێ چه‌ندێ كارتێكرنه‌كا خراب كریه سه‌ر موزیكا كوردی، ئه‌ڤێ چه‌ندێ وه‌كریه كو موزیكا كوردی تام و روحیه‌تا خۆ ژ ده‌ست بده‌ت، دیسان ئه‌و موزیكا كوردی یا كه‌ڤن و یا به‌ری نوكه، كاریگه‌ریا خۆ ل سه‌ر ژیانا كوردان هه‌بوو، تام و خۆشیه‌كا تایبه‌ت د وێ موزیكێ دا هه‌بوو، هه‌روه‌سا دڤێت نڤشێ نوو ژی هایداری موزیكا خۆ بن و بشێن ڤێ موزیكێ وه‌كو خۆ بپارێزن و نه‌هێلن موزیكا كوردی به‌رزه ببیت، هه‌روه‌سا موزیكا بیانی ب تایبه‌تی ژی موزیكا فارسی و توركی و عه‌ره‌بی شیایه كارتێكرنا خۆ ل سه‌ر موزیكا كوردی بكه‌ت، ل رۆژهه‌لات ژی موزیكا فارسی تێكه‌لی یا كوردی بوویه و ل گه‌ل هندێ ژی حكومه‌تا ئیرانی گرنگیێ ب موزیكا كوردی ناده‌ت و پشته‌ڤانیێ ژی ل موزیكژه‌نێن كورد ناكه‌ت.
ئه‌و چه‌ند ژی ئاشكرا كر: گه‌له‌ك ژ گه‌نجێن مه هند شاره‌زایی ل سه‌ر موزیكا كوردی نینه و وه‌سا هزر دكه‌ن موزیكا بیانی ژ یا كوردی خۆشتره و موزیكا وان ژ یا كوردی كه‌ڤنتره، هه‌ر چه‌نده ئه‌ڤه كاره‌كێ شاشه و ئه‌و گه‌نجه ل سه‌ر موزیكا بیانی كاردكه‌ن، موزیكا كوردی ل گه‌ل یا بیانی تێكهه‌ل دكه‌ن و چ تام و خۆشیا موزیكا كوردی تێدا نادەین، له‌وما موزیكا كوردی ل گه‌ل یا بیانی یا جودایه و خودان تام و روحیه‌ته‌كا تایبه‌ته، دڤێت ئه‌م گرنگیێ ب موزیكا كوردی بده‌ین و خۆ ل موزیكا خۆ بكه‌ینه خۆدان.
